Այս պահին էլեկտրաէներգիայի թանկացման դեմ ակցիա է իրականացվում նաև Գյումրու Թատերական հրապարակում: «Առաջին լրատվական»-ի հետ զրույցում ակտիվիստ Կարեն Պետրոսյանը նշեց, որ Թատերական հրապարակում մարդկանց հոսքը ավելանում է: Միայն երեկ էր ակցիան իրականացվել ոստիկանության դիմաց, որպեսզի անօրինական ձևով ոստիկանություն բերվածները ազատ արաձակվեն:
«Երեկ լուսադեմին՝ 6:30-ին, մեզ ոչ թե բերման էին ենթարկել, այլ առևանգել էին, մենք հետո բաժնում ենք իմացել, որ մեզ առևանգող մարդիկ քաղաքացիական հագուստով ոստիկաններ են»,- մանրամասնեց Կարեն Պետրոսյանը ՝ հիշեցնելով, որ Գյումրիում ևս ոստիկանությունը քրեական գործ է հարուցել խուլիգանության փաստի առթիվ: Գործի շրջանակներում բոլոր բերման ենթարկվածները հարցաքննվել են որպես վկա, իսկ ինքը՝ որպես կասկածյալ, և նրա նկատմամբ խափանման միջոց է ընտրվել ստորագրությունը չհեռանալու մասին:
«Մենք արդեն հայտարարել էինք, որ տեղի ոստիկանապետը, նրա տեղակալը ակցիայի մասնակիցների հետ խոսում են հայհոյախառն, կատարում են անօրինական գործողություններ և մարսում են դրանք, ուստի ոստիկանների պահվածքը վիրուսի պես տարածվում է, Վլադիմիր Գասպարյանը պետք է լրջորեն հետևություն անի «բարեփոխված» ոստիկաննների մասին»,-նշեց Կարեն Պետրոսյանը: Նա նաև Վլադիմիր Գասպարյանին հիշեցրեց, որ Գյումրու Յոթվերք եկեղեցի աղոթելու հրավերը ուժի մեջ է, և քանի որ Վլադիմիր Գասպարյանը խոսում է իրավական, բարոյական արժեքներից, պետք է կարողանա այնպես անել, որ ոստիկանությունը հետևի թե՛ բարոյական սկզբունքներին և թե՛ օրենքի տառին: «Օրերով, ժամերով կարելի է աղոթել հայ ազգի համար ու նաեւ «պաստառճղյան» ոստիկանապետերի»,- ասաց մեր զրուցակիցը:
Կարեն Պետրոսյանը նաև ընդգծեց, որ Գյումրիում ակցիաները շարունակվելու են, մինչև որ իշխանությունները լսեն հանրության ձայնը:
