Ոստիկանությունը ինչ չի փնտրում: Երեկ ես եմ զանգել ոստիկանություն, ասել եմ, որ ես տանն եմ, ինչո՞ւ եք ինձ փնտրում, և որպես պատասխան՝ լսել, որ իրենք ինձ չեն փնտրում»,- «Առաջին լրատվական»-ի հետ զրույցում ասաց Հակոբ Հակոբյանը (Ճոյտ):
Հիշեցնենք, որ երկու օր է՝ լրատվամիջոցները գրում են, որ ոստիկանությունը փնտրում է ԱԺ նախկին պատգամավոր Հակոբ Հակոբյանին և նրա որդուն՝ Արայիկ Հակոբյանին, և նշվում էր, որ նրանք ինչ-որ քաղաքացու՝ Պարույր Թորոյանի են ծեծի ենթարկել:
«Մենք նրան ծեծի չենք ենթարկել, այլ օգնություն ենք ցույց տվել: Մենք նրան կանչել էինք մեր օբյեկտի տարածքի աղբը իր տրակտորով հեռացնելու համար: Բայց պարզվեց, որ նա էպիլեփսիայով հիվանդ է: Հանկարծ ընկավ ցնցումների մեջ ու գլուխը հարվածեց գետնին: Ես էլ ձեռքով սեղմեցի, որ բերանը բացվի, որ լեզուն դուրս քաշեմ: Ու երբ ես նրա բերանը սեղմում էի, որ լեզուն դուրս քաշեմ, իմ ձեռքերն արյունոտվել էին, ու երբ նա ուշքի եկավ, աչքերը բացեց, առաջինն ինձ տեսավ արյունոտ ձեռքերով ու սկսեց ինձ խփել: Բայց մենք նրան ուշքի բերեցինք, նստեց իր տրակտորը ու գնաց»,- պատմեց Հակոբյանը՝ ավելացնելով, որ դրանից հետո այդ տղան գնացել է հիվանդանոց, որտեղից, բնականաբար, ոստիկանությունն է սկսել հետաքրքրվել, ու նա էլ պատմել է այս ամենը, թե աչքերը բացել է ու Հակոբյանին է տեսել արյունոտ ձեռքերով:
Հակոբյանն ասաց, որ ինքն արդեն իսկ ոստիկանությանն ամեն ինչ բացատրել է: Ինչ վերաբերում է որդուն, ապա ասաց, որ իր որդին բացարձակապես կապ չունի այդ դեպքի հետ: Նա այդ պահին եղել է հիվանդանոցում՝ եղբոր մոտ: «Կամեռաներ կան, ֆիքսել են, որ նա այդ պահին հիվանդանոցում է եղել»,- ասաց Հակոբյանը:
Ինչ վերաբերում է գազալցակայանի պայթյունից այրված մյուս որդուն՝ Արմեն Հակոբյանին, ապա հայրն ասաց, որ վիճակում առանձնապես փոփոխություն չկա և հիմա նրան վիրահատում են:
