ԴԱԻՇ-ի ( Իրաքի և Շամի իսլամական պետություն) գրոհայիններն անխնա ոչնչացնում են քրիստոնեական մշակույթը: AFP-ն պատմում է իրաքցի վանական Նաջիբ Միքայելի մասին, որը սեփական կյանքը վտանգելով՝ մի քանի հարյուր հնագույն ձեռագիր է փրկել իսլամիստներից:
Հաղորդվում է, որ վանականը ոչնչացումից փրկել է 13-19-րդ դարերին թվագրվող 6 արկղ ձեռագիր: Հայտնի է, որ արժեքավոր փաստաթղթերն անցած տարվա օգոստոսին իրաքյան Մոսուլ քաղաքից տեղափոխվել են Իրաքյան Քրդստան:
Միքայելի ջանքերով փրկված հավաքածուում կան պատմական ու փիլիսոփայական տեքստեր, քրիստոնեությանն ու իսլամին, երաժշտությանն ու գրականությանն առնչվող փաստաթղթեր, կարևոր ձեռագրեր: Դրանք գրված են հայերենով, արամերենով, արաբերենով և ասորերենով։
Վանականի խոսքով՝երբ իսլամիստները գրավել են Մոսուլը, իրենք որոշել են հավաքել արժեքավոր ձեռագրերն ու մեքենայով փախչել Քարաքոշ: Սակայն Իրաքի ու Քուրդիստանի սահմանին գրոհայինները թույլ չեն տվել, որ վանականի մեքենան անցնի: Այդ ժամանակ նա սկսել է ձեռագրերը գաղտնի փոխանցել ոտքով գնացողներին: Արդյունքում բոլոր ձեռագրերն անվնաս հասել են Իրաքյան Քրդստան և այժմ պահվում են Էրբիլի գրադարանում:
