Բեռլինում թուրքական համայնքի ներկայացուցիչները Բունդեստագի առջև ցույց են անցկացրել՝ խորհրդարանականներին կոչ անելով դադարեցնել Հայոց ցեղասպանության շուրջ քննարկումները։ Այս մասին գրում է թուրքական «Զաման» թերթը։
«Այն, ինչ անում են գերմանացի քաղաքական գործիչները, միակողմանի մոտեցում է, ուստի ամեն բան անելու ենք, որպեսզի թուրքերի ձայնը ևս լսելի լինի նրանց։ Մենք ուզում ենք հիշեցնել, որ խորհրդարանը դատարան չէ, իսկ պատմությունը հիմնված է ճշմարտության վրա»,- ասել է բողոքի ակցիայի կազմակերպիչներից Ալի Սյոյլեմեզօղլուն։
Հիշեցնենք, որ Գերմանիայի խորհրդարանը 2005 թվականին ընդունել է Հայոց ցեղասպանությունը ճանաչելու մասին որոշում: Բունդեստագի որոշման մեջ, սակայն, չի օգտագործվել Հայոց ցեղասպանություն եզրը, այլ նշվել է «հայերի կոտորածներ»:
Այս տարվա ապրիլի 24-ին Բունդեստագում տեղի են ունեցել լսումներ Հայոց ցեղասպանության թեմայով, որոնց ընթացքում պատգամավորների մեծ մասն օգտագործել է «ցեղասպանություն» եզրը՝ քննադատելով Օսմանյան կայսրությունում տեղի ունեցած հայերի կոտորածն ու բռնի տեղահանումը։ Այս պահին շրջանառության մեջ է դրված նոր բանաձև Հայոց ցեղասպանության մասին, որն ընդունվելու դեպքում Գերմանիայի խորհրդարանը Հայոց ցեղասպանությունը ճանաչելու մասին որոշում կկայացնի, որում օգտագործված կլինի «ցեղասպանություն» բառը։
Իսկ ապրիլի 23-ին Գերմանիայի մայրաքաղաք Բեռլինի Մայր տաճարում մասնակցելով Հայոց ցեղասպանության զոհերի հիշատակին նվիրված արարողությանը՝ Գերմանիայի նախագահ Յոախիմ Գաուկը Օսմայան կայսրությունում հայ ժողովրդի նկատմամբ իրականացված կոտորածը կոչել էր «ցեղասպանություն» եզրով: Մեկ օր անց Գերմանիայի խորհրդարանի՝ Բունդեստագի կողմից քննարկումներ էին անցկացվել Հայոց ցեղասպանության վերաբերյալ, որոնց ընթացքում բազմիցս օգտագործվել էր «ցեղասպանություն» բառը։
