«Միանշանակ, երաժշտության մասին չպետք է մտածել որպես փող աշխատելու միջոցի, դրա մասին ընդհանրապես չպետք է մտածել, պետք է հավատալ նրան, ինչ ուզում ես անել, իսկ փողը կգա: Միշտ կգտնվեն մարդիկ, ովքեր կօգնեն: Պետք է լինի իսկական սեր ու գայթակղություն և մեկը, որ պետք է հետևի այդ երեխային՝ իմ ճանապարհի մասին եմ ասում. եթե հորեղբայրս չլիներ, ես երևի չէի հասնի այս ամենին»,- այսօր լրագրողների հետ հանդիպմանն ասաց աշխարհահռչակ դաշնակահար Տիգրան Համասյանը:
Կոմպոզիտոր Տիգրան Մանսուրյանն էլ հավելեց, որ արվեստագետը՝ փող ունենա, թե չունենա, պետք է մնա արվեստագետ. «Այս պարագայում պետք է հիշեմ Մոդիլիանիին, որ կիսասոված մահացավ, և Պիկասոյին, որ հսկայական գումարներ ուներ. երկուսն էլ հավատարիմ մնացին իրենց կոչմանը»:
Տիգրան Համասյանը, ով մասնակցել էր Երևանում Աֆրիկյանների շենքի պահպանման ակցիաներին, ի պատասխան լրագրողի դիտարկմանը՝ այդպես էլ այդ շենքը հնարավոր չեղավ փրկել, ասաց. «Մի օրինակ եմ ուզում բերել. ցանկացած եվրոպական քաղաք չի քանդում իր ունեցածը, իրենք միշտ վերանորոգում են: Երբ գնում ես Թուլուզ կամ Փարիզ, երբեք չես տեսնի՝ եղածը քանդեն, կարող են նոր ճարտարապետական կոթող կառուցել, բայց համենայնդեպս՝ հինը պահպանում են: Այդ պահպանողականությունը մեզ մոտ չկա: Կարող է ֆասադը թողնեն, հետևից մի տգեղ բան սաքեն, շատ տխուր է։ Հետո մենք զղջալու ենք դրա համար»,- նկատեց նա:
Ավելին՝ տեսանյութում:
