Ճանապարհային ոստիկանությունը հայտնել է, որ պարտադիր ապահովագրության գործող պայմանագիր չունենալու դեպքում ապրիլի 20-ից սկսած կկիրառվեն վարչական միջոցներ՝ սահմանված նվազագույն աշխատավարձի հարյուրապատիկի, այսինքն՝ հարյուր հազար դրամի չափով տուգանքներ:
Հետաքրքիրն է այն է, որ ոստիկանությունը վարորդներին նաև զգուշացրել էր, որ ՃՈ-ն հագեցած է այնպիսի տեխնիկական հնարավորություններով, որոնք թույլ են տալիս ավտոմատ կերպով հայտնաբերել այն տրանսպորտային միջոցները, որոնք վարում են առանց ԱՊՊԱ-ի: Մինչև այժմ ՃՈ-ն ԱՊՊԱ չունեցող վարորդներին տուգանում էր այն ժամանակ, երբ վթար էլ լինում, կամ ճանապարհային ոստիկանության աշխատակիցը խախտում կատարած մեքենան կանգնեցնում էր և զուգահետ հետաքրքրվում ԱՊՊԱ-ով:
Անդրադառնալով այս թեմային՝ «Անհատ տաքսու վարորդների իրավունքների պաշտպանության կենտրոն» ՀԿ փոխնախագահ Արսեն Պետրոսյանը շեշտեց, որ ակնհայտ է՝ ապահովագրվող մեքենաների քանակը բավականին նվազել է, քանի որ ԱՊՊԱ-ն միշտ քաշքշուկներ է առաջացնում:
Ըստ նրա ՝ ոստիկանությունը և ԱՊՊԱ գործակալությունը կարող են համագործակցել և միմյանց ինֆորմացիա տրամադրել՝ տվյալ պետհամարանիշով մեքենան ապահովագրվա՞ծ է, թե՞ ոչ, որից հետո արդեն կլինեն տուգանքների ծանուցումները:
Արսեն Պետրոսյանը նաև նկատեց, որ խնդիրը ոչ թե այն է, որ կան անպարտաճանաչ վարորդներ, այլ բազմաթիվ այլ հարցեր՝ սկսած ԱՊՊԱ-ի ժամանումից մինչև փոխհատուցում։ Բացի այդ, օրինակ՝ տաքսիների պարագայում այլ հարց կա. ամեն ընկերություն չէ, որ համաձայնում է ապահովագրել տաքսիներին, դրանք համարվում են ռիսկային. եթե ԱՊՊԱ-ն սկսում է 30 հազար դրամից, ապա ռիսկայինների դեպքում հասնում է 50 հազար դրամի։ «Քաշքշուկներ են լինում, տարբեր պատճառաբանություններ։ Ինչքան ուզում են՝ թող տուգանեն, միևնույն է՝ տուգանքներով դաշտը չի կարգավորվի, կավելանա բողոքողների և հիասթափվողների թիվը»,- ասաց նա:
Նա նաև շեշտեց, որ տաքսի- ծառայությունների պարագայում ԱՊՊԱ-ի պայմանագրերը դժկամությամբ են թարմացնում, այնուհետև ի հայտ են գալիս խնդիրներ՝ կապված փոխհատուցման հետ: Բայց կապ չունի՝ տաքսի-ծառայությունները, ԱՁ-ները պետք է նույն դաշտում լինեն, քանի որ տուգանելիս տարբերություն չեն դնելու՝ անհատ ձեռներե՞ցն է անպարտաճանաչ եղել, թե՞ ապահովագրական այն ընկերությունները, որոնք հրաժարվել են:
Նա նաև նշեց, որ ճիշտ կլինի այս թեմայով կազմակերպվեն հանրային քննարկումներ՝ նաև վարորդներին լսելու համար:
