Կոռուպցիայի դեմ պայքարի Եվրոպայի խորհրդի պետությունների խումբը (GRECO) հրապարակել է Հայաստանի վերաբերյալ երրորդ զեկույցը, որտեղ արձանագրված է, որ Քրեական օրենսգրքի հետագա փոփոխություններն անհրաժեշտ են` Եվրոպայի խորհրդի չափանիշներին համապատասխանելու համար:
Անդրադառնալով կոռուպցիայի համար քրեական պատասխանատվության ենթարկելու խնդրին` GRECO-ի խումբը ողջունել է 2008թ.-ին Քրեական օրենսգրքում կատարված փոփոխությունները, սակայն գտել է, որ Եվրոպայի խորհրդի Կոռուպցիայի դեմ պայքարի քրեաիրավական կոնվենցիային համապատասխանելու համար անհրաժեշտ է, որ կատարվեն փոփոխություններ, որոնք թույլ կտան պատասխանատվության ենթարկել կաշառք վերցնողներին, և որ այս փոփոխությունը վերաբերի նաև մասնավոր ոլորտում ներգրավվածներին, ինչպես նաև Հայաստանը հնարավորություն ունենա պատասխանատվության ենթարկել նաև իր այն քաղաքացիներին, որոնք կաշառակերության մեջ են մեղադրվում երկրի սահամններից դուրս: Հիմնական խնդիրն այս ոլորտում օրենսդրության արդյունավետ կիրառման մեջ է:
Ինչ վերաբերում է քաղաքական կուսակցությունների ֆինանսավորման խնդրին, ապա GRECO-ի խումբն արձանագրել է, որ ընթացքի մեջ են այս ոլորտի բարեփոխումների և թափանցիկություն ապահովելու համար գործողությունները: Այս առումով Հայաստանին անհրաժեշտ է այնպիսի քայլեր ձեռնարկել, որպեսզի կարգավորվի քաղաքական կուսակցություններին ընտրությունների ժամանակ հանգանակությունների տրամադրումը, ապահովվի հանգանակությունների անկախ մոնիտորինգը, հանգանակությունների տրամադրման օրենքը խախտելու դեպքում ապահովվի մեղավորներին պատասխանատվության կանչելու մեխանիզմը և պատժաչափը լինի համապատասխան գործած խախտմանը:
Զեկույցում GRECO-ի խումբը 19 առաջարկություն է ներկայացրել Հայաստանին, որոնց իրագործումը կդիտարկվի 2012թ.-ի երկրորդ կեսին:
