ԵՄ ընդլայնման և արևելյան հարևանության հարցերով եվրահանձնակատար Շտեֆան Ֆյուլեն Թբիլիսիում կայացած մամուլի ասուլիսում ասել է, որ Վրաստանն օրինակ է՝ Եվրամիության հետ գործողությունների և բարեփոխումների համաձայնեցման առումով:
Նա Վրաստանի իշխանություններին շնորհակալություն է հայտնել «Արևելյան գործընկերության» շրջանակներում Թբիլիսիում ոչ-պաշտոնական նախարարական խորհրդի հանդիպման կազմակերպման համար:
«Մենք այսօր պատահական չենք Վրաստանում, որը ԵՄ-ի հետ համաձայնեցված բարեփոխումների իրականացման առումով հիանալի օրինակ է: Մենք հույս ունենք, որ նման դիրքորոշումը կշարունակվի` չնայած գոյակցության ընթացքում առկա մարտահրավերներին»,- նշել է Ֆյուլեն:
Եվրահանձնակատարն ընդգծել է, որ ԵՄ-ն հավատարիմ է գործընկերության և ընդլայնման սկզբունքներին, որպեսզի բավարարի գործընկեր երկրների եվրոպական ձգտումները: