«Չեմ լսել, չեմ էլ պատկերացնում, թե ում հետ երեխան կարող էր խնդիր ունենալ, ինքը ոչ այդպիսի ընտանիքից էր, ոչ այդպիսի շրջապատից, որ իրեն ինքնասպանության դրդեին»,- «Առաջին լրատվական»-ի հետ զրույցում ասաց Արմավիրի մարզի Խանջյան համայնքի ղեկավար Սամվել Ավագյանը ՝ անդրադառնալով գյուղում տղայի ինքնասպանության դեպքին:
Գյուղապետը ընդգծեց, որ մահացած տղան ոչ թե 14, այլ 15 տարեկան էր: Նրա խոսքով՝ ինքնասպանություն գործած Վարուժան Միրզախանյանը ապրում էր նորմալ ընտանիքում, սոցիալական լավ պայմաններում, ուներ քույր և եղբայր։ «Ապահովված երեխա էր, աշխույժ, առույգ, փոքր ժամանակ չարաճճի էր, հիմա խելոքացել էր, դպրոցում ուսուցիչները և ընկերները նրան շատ էին սիրում, ինձ ասում էին՝ լավ երեխա էր»,- մանրամասնեց գյուղապետը:
Նա նաև պատմեց, որ փետրվարի 23-ին դպրոցի աղջիկները իրենց դասարանի տղաների համար նվերներ են գնել, Վարուժանը ևս նվեր է ստացել, տոնը նշել են, բարձր տրամադրությամբ տուն է վերադարձել, ուսուցիչներն էլ պնդում են, որ կոնֆլիկտ չի եղել:
Գյուղապետը ընդգծեց, որ ինքը չի կարող որևէ վարկած առաջ քաշել, քանի որ իր կողմից դա անպատասխանատու քայլ կլինի։ «Գործ է հարուցվել, նախաքննության փուլում է, թող պարզեն, ես առաջին անգամ ձեզանից եմ լսում , որ երեխան կոնֆլիկտ է ունեցել, սպառնացել են, արժանապատվությանը դիպչել»,- եզրափակեց նա:
Հիշեցնենք, որ դեպքի առթիվ ՀՀ քննչական կոմիտեի Արմավիրի մարզային քննչական վարչությունում նյութերի նախապատրաստման ընթացքում պարզվել է, որ անչափահասի դիակը փետրվարի 23-ին, ժամը 16:15-ի սահմաններում, հայտնաբերել է մայրը՝ իրենց տան դիմաց գտնվող անասնագոմում հակավորման թելով կախված վիճակում:
Դեպքի առթիվ փետրվարի 24-ին ՀՀ քննչական կոմիտեի Արմավիրի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 110-րդ հոդվածի 1-ին մասի հատկանիշներով, այն է՝ սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը:
Կատարվում է նախաքննություն:
