Վաշինգտոնի դատարանն այսօր վճռել է, որ ԱՄՆ նախագահ Բարաք Օբաման խախտել է երկրի սահամանադրությունը` նշանակումներ կատարելիս շրջանցելով Սենատը: Այս մասին հայցով դատարան էր դիմել «Աշխատանքի իրավունքի ազգային հիմնադրամ» ոչ կառավարական կազմակերպությունը:
Ըստ դատավորների՝ երկրի ղեկավարն իրավասու չէ աշխատանքային հարաբերությունների հարցերով ազգային հանձնաժողովում նշանակումներ կատարել: Օբաման, իր հերթին պնդում է, որ գործել է օրենքի սահմաններում, քանի որ Սենատն այդ պահին գտնվում էր խորհրդարանական արձակուրդում:
Բանն այն է, որ երկրի ղեկավարն ունի Սահմանադրությամբ ամրագրված հատուկ լիազորություններ, որոնց համաձայն կարող է այս կամ այն անձանց նշանակել պաշտոնների` առանց Սենատի համաձայնության, եթե այն գտնվում է խորհրդարանական արձակուրդում կամ կարճաժամկետ հանգստում, օրինակ՝ ազգային տոնի կապակցությամբ: Նման իրավունքից նախագահները հազվադեպ են օգտվում: Որպես կանոն՝ այն դեպքերում, երբ այս կամ այն թեկնածուի հարցում չեն կարողանում օրենսդիրի հետ համաձայնության գալ:
Վերաքննիչ դատարանի անդամներն ուշադրություն են հրավիրել այն փաստի վրա, որ այն պահին, երբ Օբաման այդ նշանակումները կատարել է, Սենատը տեխնիկապես շարունակել է գործել: Բանն այն է, որ հանրապետականները պահել էին մի քանի մարդու՝ շաբաթական 2 անգամ Սենատի նիստ գումարելու համար, հատուկ, որպեսզի Օբաման չկարողանա չարաշահել իր լիազորությունները: Այդպիսով համարվում է, որ Կոնգրեսի վերին պալատը չի գնացել արձակուրդ, այլ շարունակել է աշխատել:
Սպիտակ տունը հայտարարել է, որ կբողոքարկի վերաքննիչ դատարանի որոշումը ԱՄՆ գերագույն դատարանում:
