Հայաստանի ազգային հավաքականի կիսապաշտպան Հենրիխ Մխիթարյանը լայնածավալ հարցազրույց է տվել ռուսական sportsdaily կայքին՝ մասնավորապես նշելով հետևյալը.
««Փյունիկ»-ից Դոնեցկի «Մետալուրգ» տեղափոխությունից մինչև հիմա չեն փոխվել մարդկային հատկանիշներս: Ես հասարակ անձնավորություն եմ: Հնարավոր է՝ ոմանք կարծում են, որ ես աստղ եմ: Կփորձեմ ամեն ինչ անել, որպեսզի բարելավեմ խաղային որակներս:
Հովսեփյանի՝ մեծ ֆուտբոլից հեռանալուց հետո ցավ ապրեցի: Նա հայկական ֆուտբոլի լեգենդն է: Ինձ համար այդ տեղեկատվությունը շատ անսպասելի էր: Սակայն հասկանում եմ, որ նա արդեն 40 տարեկան էր և եկել էր ֆուտբոլին հրաժեշտ տալու ժամանակը: Սարգիսին առողջություն և հաջողություններ եմ մաղթում հետագա աշխատանքում:
Ընտանիքիս անդամները պահանջում էին, որ կենտրոնանամ դպրոցի վրա: Նրանք ցանկանում էին, որ ես կրթություն ստանամ, քանի որ սպորտում անհաջողության մատնվելու դեպքում ես պետք է այլ բանով զբաղվեի: Ծնողներիս շնորհիվ անհրաժեշտ կրթություն եմ ստացել:
ԱՊՀ առաջնության մասին հստակ ոչինչ չեմ կարող ասել: Գաղափարը լավն է: Կարող է հզոր առաջնություն ձևավորվել: Եթե Հայաստանը ներկայացնի «Փյունիկ»-ը, ապա լուրջ համալրում կստանա: Կընդլայնվի ակումբի բյուջեն: «Փյունիկ»-ն ավելի կհզորանա, չնայած, որ հիմա էլ հզոր դպրոց, ֆուտբոլիստներ ունի, որոնք կարող են համալրել արտասահմանյան թիմերի կազմերը»,- նշեց Մխիթարյանը:
