Ինչպես և տեղեկացրել էր «Հրապարակ»-ը, Հրանտ Բագրատյանի թեկնածության շուրջ համախմբման գործընթացն ընթացքի մեջ է: ՀԱԿ անդամ Երջանիկ Աբգարյանը ևս կսատարի Հրանտ Բագրատյանի թեկնածությունը: Մինչ օրս սատարելու հայտարարությամբ են հանդես եկել Սոս Գիմիշյանը՝ «Քրիստոնեաժողովրդավարական հայրենիք» կուսակցությամբ, և Ռուբեն Թորոսյանն՝ իր ՀԿ-ով: Առաջիկայում, որոշ լուրերով, նման հայտարարություն կանի Կանաչների միությունը՝ Արմենակ Դովլաթյանի ղեկավարությամբ, ինչպես նաև ՀԱԿ շարքերից անհատ անձինք:
Երջանիկ Աբգարյանը երեկ հրաժարվեց խոսել և գնահատական տալ ՀԱԿ-ում ներկայումս ընթացող գործընթացներին, սակայն պատասխանեց մի քանի հարցի:
– Պարոն Աբգարյան, ճի՞շտ էր մարտավարական տեսանկյունից, որ ՀԱԿ-ը չհամախմբվեց Հրանտ Բագրատյանի թեկնածության շուրջ, և այսօր թերևս համախմբման բացակայությունն է ՀԱԿ-ում քաոսային վիճակի հանգեցրել:
– Ես չեմ ուզում ՀԱԿ-ի ներկա իրավիճակների մասին խոսել, իսկ Բագրատյանին չսատարելու որոշումը… Ես անձամբ գտնում եմ, որ Բագրատյանին պետք է աջակցել, ես ակտիվ պայքարի կողմնակից եմ և ինքս աջակցելու եմ:
– ՀԱԿ-ն ասում է, որ ցանկացած թեկնածու լեգիտիմացնում է Սերժ Սարգսյանի վերընտրությունը, և այդ պատճառով է հրաժարվում սատարել Բագրատյանին: Ձեր կարծիքով, սա պատճա՞ռ է, թե՞ իրականում այլ պատճառ կա:
– Ես չգիտեմ, Կոնգրեսը համարում է, թե ամեն ինչ եղած-վերջացած է… չգիտեմ, իրենք իրենց հաշվարկն ունեն, ես՝ իմ: Ես անկախ ամեն ինչից գտնում եմ, որ պայքարը պետք է շարունակել: Ավելին, կարծում եմ, որ առաջիկայում կարող է առաջանալ բավական բարդ իրավիճակ, սուր խնդիրներ առաջ գան, որոնք կարող են ամեն ինչ փոխել: Արտաքին և ներքին բազում խնդիրներ են ծառացած երկրի առջև, որոնք կարող են պայթել: Չպետք է անտեսել, որ մեզ մոտ ամեն ինչ շատ պրոբլեմատիկ իրավիճակում է գտնվում, և մի հասարակ կայծից կարող է բոց բռնկվել: Հետևաբար ես կարծում եմ, որ չպետք է այս պարագայում հրաժարվել պայքարից:
– Գուցե այժմ ՀԱԿ-ականները սթափ գնահատեն իրավիճակը, և համախմբո՞ւմ տեղի ունենա, ընդհանրապես ի՞նչ եք կարծում, Բագրատյանի շուրջ միավորման դեպքում ՀԱԿ-ում նման խմորումներ կընթանայի՞ն, որոնք, չի բացառվում, հետագայում ՀԱԿ-ը կկազմաքանդեն:
– Իհարկե չի բացառվում, որ այդ հարցը քննարկեն Կոնգրեսում, հիմա քննարկվում են Կոնգրեսի բարեփոխման հարցերը, տեսնենք ինչ կառաջանա այդ ամենից:
– Պարոն Աբգարյան, գնահատելով իրավիճակը, Դուք չբացառեցիք, որ իրավիճակը կարող է տհաճ անակնկալներ մատուցել իշխանությանը, բայց ընդդիմության ներկայիս պահվածքն արդյոք չի՞ խանգարի դրան, նկատի ունեմ այն փաստը, որ ՀԱԿ-ը չի համախմբվում իր գաղափարակցի շուրջ, էլ ինչպե՞ս պիտի իշխանության համար տհաճ իրավիճակ առաջանա:
– Գիտեք ինչ, փորձը ցույց է տվել, որ մեր ընդդիմադիր դաշտը 1998 թվականից հետո մշտապես հաղթել է: Հիմա ես չեմ բացառում, որ այս անգամ էլ կարող է հաղթել և խնդիրն ավելի շատ այդ հաղթանակին տեր կանգնելուն է վերաբերում: Հաղթանակի դեպքում դժվար է պատկերացնել, թե ինչպես իշխանությունն այս անգամ կարող է կուլ տալ այդ դրությունը: Կարծում եմ, որ այս անգամ նաև մի փոքր բարդ է լինելու ընտրությունը կեղծելու համար, չնայած այդ գործընթացն արդեն սկսված է ըստ էության, բայցևայնպես, դրանից պետք է օգտվի ընդդիմությունը, որպեսզի էլ ավելի վարկաբեկի իշխանությանը:
