Երևանի գազալցակայաններում գազի գինն իջել է: «Մուլտի Լիոն» գազալցակայաններում 1 խմ գազն այսօր՝ դեկտեմբերի 22-ին, լիցքավորվել է 200 դրամով:
«Ես դեկտեմբերի 19-ին նույն գազալցակայանում լիցքավորել եմ 230 դրամով, իսկ այսօր արդեն՝ 30 դրամ էժան»,- հայտնեցին տաքսու վարորդների շրջանում հարցվածները, որոնք մեծ մասամբ օգտվում են քաղաքի մերձակայքի գազալցակայաններից:
Այս նույն ժամանակահատվածում, երբ Երևանում 1 խմ գազը վաճառվում է 200-210 դրամով, քաղաքին մոտ տարածքներում՝ մայրուղիներում և մարզերում 170-180 դրամ է:
«Ես այս հարցում սկզբունքային եմ. եթե աշխատանքից կամ հանդիպումից ուշանալու հարց չկա, միանշանակ գնում եմ քաղաքից դուրս լիցքավորելու և խորանարդ մետրի համար վճարում եմ 170-180 դրամ: Ես մեծահարուստներին չեմ ուզում ավելի հարստացնել, միշտ նախընտրում եմ ավելի էժան առաջարկը: Բացի դրանից՝ ուզում եմ նոր մարդկանց հարստացնել, ովքեր այսօր, բառացիորեն, մեր «գլխին նստած» չեն»,- ասաց վարորդներից մեկը:
Տրանսպորտային ծառայություններ մատուցող շատ կազմակերպություններ արդեն պայմանագիր ունեն 200-210 դրամ գին առաջարկող գազալցակայանների հետ, ինչն ուղղակիորեն ազդում է նրանց մատուցած ծառայության գնի վրա՝ լինեն տաքսիներ, երթուղայիններ թե մատակարարներ:
«Հայաստանի սպառողների ասոցիացիա» ՀԿ նախագահ Արմեն Պողոսյանը «Առաջին լրատվական»-ի հետ զրույցում հայտնեց, որ նման դեպքերում կազմակերպությունը կարող է խզել պայմանավորվածությունը և ավելի էժան գներով ձեռք բերել գազը:
«Ոչ մի իրավական հետևանք չի կարող առաջանալ, հատկապես եթե պայմանագրում ռիսկերի գնահատում չկա, և թանկացումը ներառված չէ այդ գնահատման մեջ: Ինչպես նաև պայմանագրով նշված գնային առաջարկները չեն կարող փոխվել նոր գների ֆոնին, որովհետև նոր գին կարող է առաջարկվել միայն պայմանագրի ժամկետը ուժը կորցրած ճանաչվելուց հետո»,- նշեց սպառողների իրավունքների պաշտպանը:
Նա, ցավոք, մռայլ կանխատեսում ունի, կարծում է, որ մինչև Ամանոր գազի գները չեն իջնի, բայց էժան գներով սպասարկող գազալցակայանները շատ հնարավոր է՝ վերանայեն իրենց առաջարկած գները և բարձրացնեն:
«Նոր տարուց հետո, սակայն, հնարավոր է գների իջեցում՝ պայմանավորված ածխաջրածնի գների հետ: Իսկ եթե էժանացում չլինի, դա կլինի դրամի գնողունակության անկման պատճառով»,- նկատեց Պողոսյանը:
Այս դեպքում տրանսպորտային գների թանկացման պատճառաբանությունը դառնում է ոչտրամաբանական, որովհետև եթե համագործակցությունը պայմանագրային է, ոչ թե «ախպեր-ընգերային», ուրեմն հեշտորեն կարելի է խզել և հին գնով շարունակել գազ գնել նոր գործընկերոջից:
Հիշեցնենք, որ վերջին օրերին երկրում ֆինանսական շոկի պայմաններում երևանյան որոշ գազալցակայաններում գազի գինը բարձրացել էր 1 խմ դառնալով 230 դրամ 200 դրամի փոխարեն: Երևանից դուրս մնացած բոլոր գազալցակայաններում գինը պահպանվեց՝ 1խմ գազի դիմաց 170-180 դրամ:
