«Գազի կայաններում վերականգնվել է 200 դրամ լիցքավորումը, այնպես որ այսօր առավոտյան այդ հարցը կարգավորվել է, երեկ 230 էր դարձել, այսօր առավոտվանից 200 է»,- այսօր հայտարարել է վարչապետ Հովիկ Աբրահամյանը:
Մինչդեռ վարչապետի հայտարարությունից հետո՝ երեկոյան էլ Երևանի մի շարք գազալցակայաններում 1խմ գազը վաճառվում էր դեռևս 210 դրամով: Մեր այցելության պահին Մալաթիա-Սեբաստիա վարչական շրջանում, Արգավանդում գտնվող գազալցակայաններում 210 դրամ էր: Աշխատակիցներն ասացին, որ նվազել է, սակայն հրաժարվեցին ասել, թե դոլարի կուրսի բարձրացման ժամանակ որքան էր բարձրացել գազի գինը:
ԲՀԿ առաջնորդ Գագիկ Ծառուկյանին պատկանող գազալցակայաններում, որտեղ այս օրերին գազի ամենաբարձր գինն էր, կրկին 210 դրամ էր: «Մեր մոտ մինչ այդ եղել է 230, բայց այսօր արդեն 210 դրամով ենք վաճառում: Մեզ մոտ առհասարակ 200 դրամով է վաճառվում գազը, բայց մոտ 10 օր վաճառվեց 230 դրամով, իսկ այսօր առավոտից արդեն վաճառում ենք 210 դրամով»,- «Առաջին լրատվական»-ի հետ զրույցում ասաց «Մուլտի գազ» լցակայանի աշխատակիցը:
Ինչ վերաբերում է դիզելին, որն այսօր առավոտյան դարձել էր 500 դրամ, դոլարի կուրսի իջեցմանը զուգահեռ երեկոյան դարձել էր արդեն 480 դրամ:
