Դրամը որոշակիորեն կամրապնդվի, առաջին քայլն արդեն արվել է: «Առաջին լրատվական»-ի հետ զրույցում այս մասին հայտնեց Հայրենական ապրանքարտադրողների միության նախագահ Վազգեն Սաֆարյանը:
Նրա խոսքով՝ պարզապես պետք է արագ քայլեր անել, որպեսզի ժողովրդի մեջ խուճապային տրամադրություններ չզարգանան, ընդհակառակը՝ վստահություն ներշնչվի:
Ինչ վերաբերում է տեղական արտադրողներին, Սաֆարյանը նկատեց, որ նրանք, ովքեր տեղում են ապրանք արտադրում և հումքը դրսից բերում, ստիպված են եղել գները վերանայել և բարձրացնել:
«Մենք տեղական արտադրողներին հորդորում ենք չգնալ խուճապային տրամադրություններին ընդառաջ և որոշակիորեն կայունացնել իրենց գներն ու չբարձրացնել, քանի որ կորցնում են իրենց հաճախորդներին, որոնց հետագայում ավելի դժվար կլինի հետ բերել»,- ասաց նա:
Հետևաբար, ըստ նրա, պետք է խթանել արտահանման քաղաքականությունը և ավելի շատ արտահանել. «Այս տարվա վերջին մենք կարող ենք 1,5 մլրդ դոլարի սահմանը հատել, այսինքն՝ անցած տարվա մակարդակը ինչ-որ չափով կպահպանենք: Դա բավարար չէ, որ մեր դրամավարկային քաղաքականությունը կայուն պահենք, պետք է ձգտել մեծացնել արտահանման ծավալները, մենք 3 մլրդ դոլարի բացասական հաշվեկշիռ ունենք, 4, 5 մլրդ-ի ներմուծում ենք, իսկ 1,5 մլրդ արտահանում, 3 մլրդ դոլարն անընդհատ Հայաստանից դուրս է գալիս»:
Ավելին՝ տեսանյութում: