«Հայաստանն արևմտյան երկիր է». «Առաջին լրատվական»-ի հետ զրույցում նման տեսակետ հայտնեց Հայաստանում Շվեյցարիայի արտակարգ և լիազոր դեսպան Լուկաս Գասերի տիկին Մարիլ Գասերը՝ անդրադառնալով ամանորյա ամենամյա ցուցահանդես-վաճառքին և Շվեյցարիայի դեսպանատան ներկայացրած ապրանքներին:
Տիկին Գասերը տեղեկացրեց, որ ամեն տարի Շվեյցարիայից Երևան են բերում Շվեյցարիային բնորոշող ապրանքներ, ինչպիսիք են՝ պանիրը Ֆրիբուրգից, շոկոլադը, որն արտադրվում է 1826 թվականից և շատ թանկարժեք է: Նա ներկայացրեց փոքրիկ թխվածքաբլիթներ, տրյուֆելներ և ձեռագործ զարդեր:
Տիկինը նշեց, որ շատ է սիրում Հայաստանը, որը, նրա համոզմամբ, արևմտյան երկիր է, եվրոպական, հավանում է մարդկանց, նրանց ապրելակերպը, բարությունն ու նրանց կյանքը: «Հատկապես ես հավանում եմ այստեղի մարդկանց, շատ մարդամոտ են, ես ինձ այստեղ զգում եմ՝ ինչպես, օրինակ, Հարավային Ամերիկայում. մարդիկ տաք են, բարի: Ի դեպ, այստեղ ես ուտելիքը ևս շատ եմ հավանում: Մենք Հայաստանում Ամանորը միշտ տոնում ենք շատ ուրախ: Մենք այստեղ ենք, ուստի պետք է վայելենք այն ամենը, ինչ այս երկիրը տալիս է մեզ՝ ջուր, լեռներ, ամեն ինչ»,- ասաց Մարիլ Գասերը:
