Եգիպտոսի Գերագույն վարչական դատարանը որոշել է երկրի առաջատար «Ազատություն և արդարություն» և «Ան-Նուր» իսլամիստական կուսակցությունների ապօրինի ստեղծման և լուծարման մասին գործը փոխանցել Գերագույն դատարանի կոլեգիայի դիտարկմանը: Այս մասին հայտնում է Trend-ը՝ հղում անելով վարչական դատարանի ներկայացուցչին:
Կոլեգիան պետք է որոշի կուսակցությունների գործունեության լեգիտիմությունը և մարտի 16-ին այդ առնչությամբ վերջնական որոշում կայացնի:
Ավելի վաղ եգիպտացի փաստաբանները մի քանի հայտարարություն էին տվել դատախազություն այդ կուսակցությունների լուծարման պահանջով: «Ազատություն և արդարություն» կուսակցությունը «Մուսուլման եղբայրներ» իսլամական շարժման քաղաքական կազմկերպությունն է, իսկ «Ան-Նուրը» ներկայացնում է պահպանողական «Սալաֆիական կոչ» իսլամիստական միավորումը:
Երկու շարժումներն էլ Հոսնի Մուբարաքի կառավարման օրոք արգելված են եղել: Հայցվորների կարծիքով՝ երկու կուսակցություններն էլ ստեղծվել են կրոնական հիմքի վրա և հստակ քաղաքական ու կուսակցական դրույթներ չունեն, ինչը հակասում է Եգիպտոսի օրենսդրությանը:
