Միացյալ նահանգների՝ ՆԱՏՕ-ի եվրոպական դաշնակիցները պետք է մեծացնեն պաշտպանությանն ուղղված ծախսերը, այլապես դա կարող է ազդել միջազգային կայունության ապահովման՝ դաշինքի հնարավորությունների վրա: Այս մասին հայտարարել է ՆԱՏՕ-ում ԱՄՆ դեսպան Իվո Դաալդերը, հայտնում է Gruziya Online-ը:
Ավելի վաղ ՆԱՏՕ-ի գլխավոր քարտուղար Անդերս Ֆոգ Ռասմուսենը Հյուսիսատլանտյան դաշինքի անդամներին կոչ էր արել չկրճատել ներդրումները պաշտպանական ոլորտում: Նա խոստովանել էր, որ երբ դաշինքի երկրները փորձում են կրճատել բյուջեի դեֆիցիտն ու պետպարտքը, պաշտպանության համար ռեսուրսներ փնտրելը դյուրին գործ չէ: Նրա խոսքով՝ այդ իսկ պատճառով ՆԱՏՕ-ի անդամները պաշտպանական ոլորտում ներդրումների ընդլայնման վերաբերյալ համաձայնության կգան Եվրոպայի տնտեսության առողջացումից հետո:
ՆԱՏՕ-ի պահանջների համաձայն՝ անդամ երկրների ծախսերը պաշտպանության վրա պետք է լինեն ազգային ՀՆԱ-ի առնվազն 2 տոկոսի չափով:
ԵՄ անդամ երկրների պաշտպանական ծախսերը կազմում են միջինը ազգային ՀՆԱ-ի 1.6 տոկոսը՝ ԱՄՆ 5 տոկոս ցուցանիշի դեպքում: 2011-ին ԵՄ պետությունները պաշտպանության համար ընդհանուր առմամբ ծախսել են 180 մլրդ եվրո՝ 5 տարի առաջվա ավելի քան 200 մլրդ դոլարի փոխարեն:
