Նոյեմբերի 20-ին պառլամենտի աշխատանքները, ըստ էության, ֆիասկոյի են վերածվել կառավարության համար: Մի շարք օրինագծեր, որոնց հեղինակը կառավարությունն է եղել, տապալվել են քվեարկության արդյունքում: Սա, ըստ էության, աննախադեպ իրավիճակ է նույնիսկ Տիգրան Սարգսյանի կառավարության համար, որը նման ֆիասկոյի Ազգային Ժողովում կարծեք թե չի արժանացել երբեք, չնայած այն բանին, որ Սարգսյանը բացարձակապես յուրային չէր դիտվում ՀՀԿ-ում՝ ի տարբերություն Հովիկ Աբրահամյանի: Հովիկ Աբրահամյանը թվում է, որ ՀՀԿ-ում ոչ միայն յուրային է, և նույնիսկ ԱԺ նախագահի պաշտոնը թողնելուց հետո ԱԺ-ում շարունակում է մեծ ազդեցություն ունենալ, սակայն պարզվում է, որ Աբրահամյանն ԱԺ-ում բավական անպաշտպան է, թեև նոյեմբերի 20-ի մեսիջն ըստ էության ունի շատ լայն նշանակություն ներիշխանական հարաբերություններում:
Կառավարության ղեկավարին ի ցույց է դրվում, որ նա ԱԺ-ում ըստ էության չունի մեծամասնություն: Հետարքրական է, որ այս մեսիջը Աբրահամյանին է հասցեագրվում այն բանից հետո, երբ նա առաջարկություն արեց ոչիշխանական ուժերին պատվիրակություն կազմել կառավարության պատվիրակության հետ 12 կետերը քննարկելու համար: Ոչիշխանական ուժերը հրաժարվեցին այդ քննարկումներից՝ պայման դնելով, որ ՀՀԿ-ն վստահելիության համար թող քայլեր կատարի Ընտրական օրենսգիրքը փոխելու և 100 տոկոս համամասնական ընտրակարգի անցնելու ուղղությամբ: Իրականում այս մերժման հասցեատերը ոչ թե Հովիկ Աբրահամյանն է, այլ Սերժ Սարգսյանը, որն էլ հայտարարել էր, որ կառավարությանը հորդորել է վերադառնալ 12 կետերին և նորից քննարկել:
Այս հայտարարությունից հետո հետաքրքրական էր, որ Հովիկ Աբրահամյանը հայտարարեց, որ 12 կետերի վերանայում չի կարող լինել: Սակայն հետո իհարկե հայտարարեց պատվիրակություն ձևավորելու և քննարկումներ անելու պատրաստակամության մասին: Ոչիշխանական ուժերը մերժում են նման քննարկումները և հայտարարում, որ դեկտեմբերի 10-ին հանրահավաքի ու երթի են մասնակցելու:
Ակնհայտ է, որ Սերժ Սարգսյանը փորձեց ոչիշխանականների համար թիրախ դարձնել Հովիկ Աբրահամյանին, սակայն Աբրահամյանը ոչիշխանականներին բանակցությունների առաջարկով թիրախը հեռացրեց իրենից, ինչն էլ հանդիսացավ մերժումն ու դեկտեմբերի 10-ին հանրահավաք և երթ անելու որոշումը:
Այսպիսով, ոչիշխանական ուժերի կողմից ակնհայտորեն խնայվող Հովիկ Աբրահամյանը կարողացավ Սերժ Սարգսյանին վերադարձնել հարվածը: Ահավասիք, այդ որոշումից հետո էլ հանկարծ պառլամենտում տապալվում են կառավարության օրինագծերը, այսինքն՝ Սերժ Սարգսյանը փորձում է գնդակը արագորեն կրկին տեղափոխել Հովիկ Աբրահամյանի դաշտ՝ ցույց տալով նրան, որ եթե կառավարությունը խնդիրներ չունի ոչիշխանական ուժերի հետ, ապա կարող է խնդիրներ ունենալ Հանրապետական խմբակցության հետ: Այլ կերպ ասած՝ Սերժ Սարգսյանը փորձում է Հովիկ Աբրահամյանին վերածել դեկտեմբերի 10-ի երաշխիքի՝ այդպիսով հայտարարված հանրահավաքն ու երթը կանխատեսելի դարձնելու համար, ակնարկելով, որ անկանխատեսելի ընթացքի դեպքում առաջին գլուխը, որ «կթռչի», կարող է Հովիկ Աբրահամյանի կառավարության գլուխը լինել: Պառլամենտում այսօր, ըստ էության, այդ գուխը դրվել է «գիլիոտինի» տակ:
Լուսանկարը՝ armtimes.com-ի
