forrights.am-ը գրում է. «Լեյտենանտ Նարեկ Այվազյանը 2009 թվականից զրկված է հայրենիքին ծառայելու հնարավորությունից: Զինվորական ծառայության ընթացքում դիրքերում դաժան ծեծի ենթարկվելուց հետո նրա առողջությունն ամբողջությամբ չի վերականգնվել: Նարեկի մարմնական վնասվածքները բուժվել են, սակայն հոգեկան առողջությանը պատճառված վնասը թույլ չի տալիս, որպեսզի երիտասարդ սպան վերադառնա ծառայության:
Նարեկ Այվազյանը գերազանց ավարտել է Վազգեն Սարգսյանի անվան ռազմական ինստիտուտը: Նրան գերազանցության դիպլոմը հանձնել է Պաշտպանության նախարար Սեյրան Օհանյանը: Նարեկը սիրով և հայրենասիրական մղումներով է մեկնել զինվորական ծառայության: 2009 թվականի հուլիսի 30-ի գիշերը Նարեկ Այվազյանը մարտական հենակետի պատասխանատուն է եղել, այդ ընթացքում 2 ժամկետային զինծառայողներ դիզվառելիք են դուրս բերել հենակետից՝ վաճառելու նպատակով:
Հենակետի ավագ Նարեկը փորձել է կանխել, ինչի համար էլ դաժանաբար ծեծվել է զինվորների կողմից: Սակայն զարմանալիորեն, հետապնդումների են ենթարկվել ոչ թե վառելիք գողացողները, այլ գողությունը կանխող սպան: Նրան հետապնդումների են ենթարկել Գրիշա Խաչատուրովի գլխավորած զորամասի հրամանատարական կազմը:
Նարեկն ի վերջո մեղավոր էր ճանաչվել ՀՀ քրեական օրենսգրքի 375 հոդվածի առաջին մասով` «Իշխանությունը չարաշահելը, իշխանազանցությունը»: Երիտասարդ սպան կալանավայրում անցկացրել է 14 ամիս 11 օր:
«25 հոգով 5 տեղանոց բանտախցում են ապրել, հերթափոխով են քնել, դա էլ է նպաստել, որ տղայիս առողջությունը քայքայվի»,- «ForRights.am»-ի հետ զրույցում ասաց Նարեկի մայրը`Աիդա Այվազյանը: Նա է որդու շահերը ներկայացնում դատարանում՝ իր հետ տանելով որդու սպայական պատվոգրերը: Նարեկը չի գալիս դատական նիստերին, առողջական վիճակը թույլ չի տալիս:
2013 թվականին ՀՀ պաշտպանության նախարարությունը պայմանագիր է կնքում «Ռ եւ Պ Սկենառ» ՍՊԸ-ի տնօրեն Ռուբիկ Հարությունյանի հետ, ով 455 հազար դրամի դիմաց պետք է բուժեր Նարեկ Այվազյանին, որպեսզի ՀՀ ՊՆ կադրերի ռեզերվում գրանցված սպան կարողանար վերադառնալ աշխատանքի:
Բուժման երկրորդ օրը բժշկի եւ Նարեկի միջեւ բանավեճ է տեղի ունենում, որի արդյունքը Ռուբիկ Հարությունյանը դադարեցնում է բուժումը: «Տղայիս անձնագիրն է փորձել վերցրել, փորձել է ստիպել, որ ինչ-որ պայմանագիր ստորագրի, բայց տղաս ինչու պիտի ստորագրեր, եթե Պաշտպանության նախարարությունն էր վճարողը: Այդպես վեճ հրահրեց բժիշկը, իսկ հետագայում մեզ մեղադրեց»,- ասում է Աիդա Այվազյանը:
Հետագայում բժիշկ Հարությունյանը Պաշտպանության նախարարի տեղակալին նամակ է գրում, որով բացատրել է, որ Նարեկ Այվազյանից անձնագիր պահանջել է հիվանդության պատմության թերթիկ բացելու համար: «Հիվանդը չի հնազանդվում, չի ենթարկվում պայմաններին, չի պահպանում տրված խորհուրդները, որը կարող է բացասաբար անդրադառնալ բուժման արդյունքների վրա»,- գրել է Ռուբիկ Հարությունյանը եւ անվավեր է ճանաչել ՊՆ-ի հետ կնքված պայմանագիրը:
«Ես չեմ հասկանում, իմ տղայիս բուժելու էին տարել, թե ենթարկացնելու,- հարցնում է մայրը,- նա բժիշկ է, պետք է ամեն ինչ աներ, որպեսզի օգներ հիվանդ տղայիս եւ ոչ թե ավելի վատացներ վիճակը»: Աիդա Այվազյանը պնդում է, որ ՊՆ-ին հասցեագրված իր նամակով Ռուբիկ Հարությունյանը կեղծ տեղեկություններ է հայտնել, որով վիրավորել է իր եւ որդու պատիվն ու արժանապատվությունը, արատավորել է բարի համբավը:
Ամբողջությամբ՝ սկզբնաղբյուր կայքում
