Կիրակի օրը՝ հոկտեմբերի 19-ին, Արագածոտն, Արարատ, Արմավիր, Գեղարքունիք, Լոռի, Կոտայք, Շիրակ, Վայոց ձոր մարզերի 14 համայնքներում տեղական ինքնակառավարման մարմինների ընտրություններ են:
Միայն առանձին համայնքներում են առաջադրված թեկնածուներից մեկ-երկուսն անկուսակցական, որոնց հետ մրցելու են Հանրապետական կուսակցության ներկայացուցիչ գործող գյուղապետերը:
ՀՀԿ-ն թեկնածու չի առաջադրել միայն երեք գյուղում՝ Գեղարքունիքի մարզի Մաքենիսում, որտեղ համայնքի գործող ղեկավարը ԲՀԿ-ական է, Շիրակի մարզի Լուսակերտ համայնքում, որտեղ համայնքապետը ՕԵԿ-ական է, և Շիրակի Հովտաշենում, որտեղ էլ գործող համայնքապետը ՀՅԴ ներկայացուցիչ է: Նրանցից միայն ՀՅԴ թեկնածուն է մրցելու անկուսակցականի հետ, իսկ մյուս երկու դեպքում թեկնածուները ընտրությանը մասնակցելու են միայնակ:
Ուսումնասիրելով Կենտրոնական ընտրական հանձնաժողովի կայքում հրապարակված ցուցակը՝ պարզ է դառնում, որ թեկնածուների մեծ մասն ընտրությանը մասնակցում են միայնակ: Նախկինում առաջադրված ձևական թեկնածուն ինքնաբացարկ է հայտնել՝ մրցակցին թողնելով միայնակ:
Թեև առաջին հայացքից թվում է, որ այս ընտրություններն անցնելու են առանց աղմուկի և ինտրիգի, քանի որ առանձնապես մրցակցություն չկա ընդդիմության և իշխանական կուսակցության ներկայացուցիչների միջև, սակայն այդպես չէ:
Գեղարքունիքի մարզի Ներքին Գետաշենի բնակիչները, զանգահարելով խմբագրություն, խնդրում էին կիրակի օրը ներկա լինել ընտրությանը, քանի որ հնարավոր է՝ չնախատեսված գործողություններ լինեն: Բնակիչները ահազանգում էին, որ գործող ՀՀԿ-ական թեկնածու Կարո Գևորգյանը վախի մթնոլորտ է տարածում ամբողջ գյուղում, որպեսզի հանկարծ որևէ մեկը չհամարձակվի քվեարկել անկուսակցական թեկնածու Սպարտակ Գորանցյանի օգտին: «Գործող ՀՀԿ-ական գյուղապետն արդեն 10 տարի է՝ ղեկավարել է գյուղը, բայց մարդիկ հոգնել են: Գյուղի մի մեծ զանգված այլևս չի ցանկանում, որ նա նորից ընտրվի գյուղապետ: Անկուսակցական ներկայացուցիչը նույնպես գյուղում մեծ համբավ է վայելում և մեծ շանսեր ունի, բայց գործողի կողմից սպառնալիքներ կան»,- «Առաջին լրատվական»-ի հետ զրույցում ասաց Ներքին Գետաշենի բնակիչներից մեկը՝ հավելելով. «Գործող գյուղապետը սպառնում է ընտրությունները բաց անցկացնել, որպեսզի տեսնի, թե ով ում օգտին է քվեարկում, որպեսզի հետո հաշվեհարդար տեսնի: Արդեն իսկ ընտրակաշառք է խոստացվում, բաժանվում: Այսպիսի վիճակ է»:
Ներքին Գետաշենցիների խոսքով՝ գործող ՀՀԿ-ական Կարո Գևորգյանին հովանավորում է Գեղարքունիքի մարզպետ Ռաֆիկ Գրիգորյանը:
Կարո Գևորգյանը, ինչպեսև սպասվում էր, մեզ հետ զրույցում հերքեց, թե ինչ-որ խնդիր կա: «Այդ ամենը իրականությանը բացարձակ չի համապատասխանում: Մեր գյուղում նման բան չի եղել և չի էլ կարող լինել: Դա ընդամենը մեկ-երկու հոգու վառ երևակայության արդյունքն է»,- ասաց Գևորգյանը՝ հավելելով. «Որպեսզի գյուղապետ դառնա այդ մարդը, ավելի լավ է՝ քարոզարշավ անի, ոչ թե ավել-պակաս հաչոցներով կամ եսիմ ինչով սուտ մատնություններ տարածի: Պետք է մակարդակով քարոզարշավ անել, և մարդիկ արդեն կորոշեն՝ ում ընտրեն»:
Գործող գյուղապետը նշեց, որ համայնքում ինքը շատ գործ է արել, վայելում է համայնքի բնակիչների համակրանքը և անգիր գիտի, թե ով է իրեն ընտրելու. բաց քվեարկություն անցկացնելու անհրաժեշտություն չկա: «Ես գիտեմ, թե ովքեր են ինձ քվեարկելու, իսկ ովքեր՝ ոչ: Ոչ մի լրացուցիչ բանի անհրաժեշտություն չկա»,- ասաց նա:
Ինչ վերաբերում է հովանավորչությանը՝ համայնքապետը նշեց, որ այս քարոզարշավի ընթացքում ինքը որևէ մեկի հովանավորությունը չի զգացել և դրա կարիքը բացարձակ չունի: «Իհարկե ՀՀԿ-ն իմ կուսակցությունն է, որին շնորհակալ եմ, բայց ես ոչ մեկի հովանավորության կարիքը չունեմ»,-ասաց նա: