ՀՀԿ-ական Մանվել Բադեյանն այսօր ԱԺ «Ժառանգություն» խմբակցության պատգամավոր Արմեն Մարտիրոսյանի հետ բանավեճի ժամանակ քննադատեց ոստիկանների արարքը, երբ հացադուլ հայտարարած Րաֆֆի Հովհաննիսյանին թույլ չէին տալիս անձրևանոց ունենալ:
«Այո, իշխանության մեջ միշտ էլ կգտնվեն մարդիկ, որոնք ավելի կաթոլիկ կուզենան երևալ, քան Հռոմի պապը»,- հայտարարեց Բադեյանը: Վերջինս անդրադարձավ նաև փաստին, որ Րաֆֆի Հովհաննիսյանին այցելելու են դպրոցի աշակերտները: «Խեղճ Րաֆֆին հինգ թե վեց երեխա ունի, իմ չափ երեխա ունի…»,- ասաց Բադեյանը: «Երեխաները հինգն են, ու Րաֆֆի Հովհաննիսյանը իսկի էլ խեղճ չի»,- իր կուսակցության առաջնորդին շտապեց պաշտպանել Արմեն Մարտիրոսյանը: Մանվել Բադեյանը չհապաղեց. «Սոված մարդը ո՞նց խեղճ չի.. Հիմա երեխաները գնալու են ասեն` մեզ նման հինգ երեխա ձեր տունը կա, գնա տիրություն արա»:
ԱԺ «Ժառանգություն» խմբակցության պատգամավոր Արմեն Մարտիրոսյանը չբացառեց, որ Րաֆֆի Հովհաննիսյանը դադարեցնի հացադուլը, եթե նրան այդ կոչով դիմի անձամբ կաթողիկոսը: «Այնուամենայնիվ, հոգևոր դասի ներկայացուցիչները մի փոքր այլ կարգավիճակում են գտնվում»,- մեկնաբանեց նա:
