Երգչուհի Քրիստինե Պեպելյանի համար տարին հագեցած էր. չորս տեսահոլովակ, երկու զուգերգ` Թաթա Սիմոնյանի և Արմեն Հովհաննիսյանի հետ, մեկ մենահամերգ: Երգչուհու կարծիքով՝ իսկապես հրաշալի տարի ստացվեց:
Այսօր «Օսկար» երաժշտական խանութ-սրահում տեղի ունեցավ Քրիստինե Պեպելյանի «Շնորհակալ եմ» ալբոմի շնորհանդեսը: Ալբոմում տեղ են գտել 12 երգեր՝ «Երջանիկ եմ», «Թե իմանաս», «Ամեն անգամ», «Շնորհակալ եմ» և այլն: Ալբոմի մեջ կան երգեր, որոնք երգչուհու համար հատուկ նշանակություն ունեն. «Ես այսօր դրանք չեմ առանձնացնի, բայց այս ձայնասկավառակում կան երգեր, որոնք հատուկ արժեք և տեղ ունեն իմ կյանքում»,- հավելեց նա:
«2012-ին ես շատ աշխատեցի, ինչի համար շատ գոհ եմ և շատ ուրախ, որովհետև կարծում եմ՝ ինձ համար սա բեղմնավոր և նպաստավոր տարի էր: Արտիստի համար զբաղված լինելը մեծ երջանկություն է, երբ նա առջևում ունի շատ անելիքներ, շատ գործեր»,- ասաց երգչուհին՝ հավելելով, որ ինքը 2012-ի այն երջանիկ արտիստներից է, ում անելիքները կիսատ են մնացել, և ուրախ է, որ շատ գործեր տեղափոխվել են 2013 թվական:
Երգչուհին խոսեց նաև կորուստների մասին. «Տարվա ավարտը որքան բուռն էր` ստեղծագործական առումով հագեցած, նույնքան տխուր` մենք բոլորս ունեցանք ահռելի կորուստ, մեր շատ սիրելի և հաստատ անփոխարինելի տիկին Ֆլորան անժամանակ հեռացավ մեզանից»:
Նա նաև նշեց, որ ցանկացած արտիստ իր արած գործերով է մնում և անմահանում. «Այնպես որ` Ֆլորա Մարտիրոսյանի ստեղծագործությունները հավերժ կմնան մեր կողքին, և ես ուրախ եմ, որ իմ ստեղծագործական կյանքի ընթացքում ստեղծել եմ ինձ համար մի թանկ արժեք՝ Ֆլորա Մարտիրոսյանի հետ զուգերգը. ես այդ բախտավորների շարքում եմ»,-ասաց նա:
Երգչուհուն եկել էին շնորհավորելու ընկերները, գործընկերները, մտերիմներն ու երկրպագուները:
