ԱՄՆ-ում ամանորյա տոների նախօրեին ձերբակալվել են Սանտա Կլաուսի հանդերձանքով մի քանի հանցագործներ: «Ձմեռային հրաշագործները» մեղարդվում է ոչ միայն մանր խուլիգանության համար:
Ինչպես հաղորդում է ABC News-ը, Ֆլորիդայում ոստիկանությունը ձերբակալել է Մայք Բյուզիին, որը Սանտա Կլաուսի հանդերձանքով աղմկոտ երեկույթ էր կազմակերպել իր տանը: «Գեդոնիստ Սանտային» բացահայտելու համար իրավապահ մարմինները մի ամբողջ գործողություն են անցկացրել: Երեկույթի հյուրերի թվում եղել է ոստիկանության գործակալ, որը հայտնվել էր այնտեղ 20 դոլարով տոմսը գնելուց հետո: Պարզելով, որ տոնախմբության կազմակերպիչը առանց արտոնագրի վաճառում է ալկոհոլային խմիչք, ոստիկանները ձերբակալել են նրան:
Սակայն ֆլորիդացի «Սանտա Կլաուսը» Սուրբ Ծնունդը կդիմավորի տանը:
Ավելի խիստ են գտնվել Տեխասի ոստիկանները, որոնք ձերբակալել են գետնի վրա կավիճով նկարած Սանտային: Վերջինիս ձերբակալելուց հետո հայտնվել է Սուրբծննդյան թզուկի հանդերձանքով նրա համախոհը, որը կավիճով գետնի վրա գրել է՝ «Free Santa»: Արդյունքում նրանք պատասխանատվության են ենթարկվել խուլիգանության համար: Բացի այդ, Սանտա Կլաուսի հանդերձանքով տղամարդը մեղադրվում է ձերբակալության ժամանակ ոստիկաններին դիմադրություն ցույց տալու համար:
Հարավային Ֆլորիդայում ոստիկանությունը ձերբակալել է Ջարեթ Սանտա անունով մի տղամարդու, որը փորձել է վճարում կատարել կեղծ թղթադրամով: Ներկայումս նա գտնվում է Փալմ-Բիչ քաղաքի բանտում և կարող է ազատ արձակվել 3 հազար դոլար գրավի դիմաց:
Վիսկոնսին նահանգում ոստիկանությունը ձերբակալել է Ջոն Շուստերին, որը վթարի է ենթարկվել: Վթարի պահին նա եղել է ոչ սթափ վիճակում և Սանտա Կլաուսի հագուստով:
