ԱՄՆ նախկին նախագահ Ջորջ Բուշ ավագը Նոր Տարին կդիմավորի ամերիկյան Հյուսթոն քաղաքի հիվանդանոցում, որտեղ մեկ ամիս է՝ բուժվում է բրոնխիտից,- հայտնում է ITAR-TASS-ը:
Վերջին օրերին 88-ամյա նախկին ղեկավարի ինքնազգացողությունը վատացել է. հազը թեթևացել է, բայց ջերմություն ու թուլություն ունի: Նախկին նախագահի ներկայացուցչի խոսքով՝ բժիշկները չեն պատրաստվում նրան դուրս գրել: Նրա դուրսգրման օրն առայժմ չի նշանակվել:
Բուշ ավագը հիվանդանոցում հայտնվել է նոյեմբերի 23-ին շատ ծանր հազով: Նա տառապում է նաև Պարկինսոնի հիվանդությամբ և ստիպված է տեղաշարժվել հաշմանդամի սայլակով: Հայտնի է, որ նախկին նախագահն իր 75-րդ, 80-րդ և 85-րդ հոբելյանները նշել է պարաշյուտից թռչելով:
Նախկին նախագահն ու նրա կինը՝ Բարբարան, ձմռանն ապրում են Տեխասում, իսկ ամռանը՝ Մեն նահանգի իրենց բնակարանում:
Ջորջ Բուշ ավագն ԱՄՆ 41-րդ նախագահն է: Նա երկիրը ղեկավարել է 1989-1993 թթ.:
