Հնդկաստանում ոստիկանությունը ջրցան մեքենաների միջոցով ցրել է ցուցարարներին, որոնք պահանջում էին կանանց համար հավասար իրավունքներ, հայտնում է Agence France-Presse-ը:
Դելիում 6 օր ընթացող միտինգների պատճառը խմբակային դաժան բռնաբարությունն է, որը տեղի է ունեցել մեկ շաբաթ առաջ Հնդկաստանի մայրաքաղաքում:
Հանցագործությունը երկրում հասարակական մեծ արձագանք է ստացել: Ցուցարարները բողոքում են նաև երկրում կանանց անվտանգության ցածր մակարդակից և պահանջում մահապատժի ենթարկել հանցագործներին:
Ինչպես ընդգծում է The Times of India-ն, այսօրվա ցույցին մասնակցել է մի քանի հարյուր երիտասարդ, որոնք պատրաստվել են երթ կազմակերպել դեպի Հնդկաստանի նախագահի նստավայր, սակայն ոստիկանությունը փակել է նստավայր տանող ճանապարհը:
Ակցիայի ընթացքում անկարգությունների հետևանքով վիրավորվել է մի քանի մարդ:
Արդյունքում ոստիկանությունը կիրառել է ջրցան սարքեր ու արցունքաբեր գազ:
Ինչպես հայտնում են ԶԼՄ-ները, բռնաբարության 23-ամյա զոհը դեռ վերակենդանացման բաժնում է: Անցած կիրակի նա իր սիրած տղամարդու հետ նստել է ավտոբուս, որտեղ եղել է 6 հարբած մարդ, որոնք ծեծել են զույգին, ապա բռնաբարել աղջկան և երկուսին էլ ավտոբուսից դուրս են նետել:
Ներկայումս 6 հանցագործն էլ կալանավորված են:
