Մի քանի օր է՝ համացանցում քննարկվում է սյունեցիների՝ Սյունիքի մարզպետ Սուրեն Խաչատրյանին աղ ու հացով դիմավորելու արարողությունը: Թեև մինչ նշանակումը շատ սյունեցիներ իրենց վրդովմունքն արտահայտեցին, այնուամենյանիվ, այդպես էլ հակադարձ ակցիա տեղի չունեցավ:
Կապանի «Մշակույթ և հասարակություն» ՀԿ նախագահ, դաշնակցական Գագիկ Ղահրամանյանն «Առաջին լրատվական»-ի հետ զրույցում աղ ու հացով դիմավորելը ներկայացում համարեց։
«Այնպես չէ, որ սյունեցին իսկապես այնքան ոգևորված էր նրա նշանակումով, որ աղ ու հացով է դիմավորում։ Դա կազմակերպված ներկայացում էր, ինչպես լինում է վերջին տարիներին. հրահանգը տալիս են, գտնվում են միշտ այդպիսի մարդիկ, ովքեր փորձում են ուրախանալու իմիտացիա ստեղծել: Սա ներկայացում էր, սա ժողովրդի էնտուզիազմի, ոգևորության արդյունք չէր, հիմնականում այնտեղ մարզպետարանի ենթակայության տակ գտնվող հիմնարկ-ձեռնարկությունների աշխատակիցներ էին, մարզպետարանի, դպրոցների և այլն, և այնպես չէր, որ սյունեցին ոգևորությամբ ընդունեց: Բայց ցանկացած տարածաշրջանում կան ներկայացման դեկորներ, դերասաններ»,- ասաց Գագիկ Ղահրամանյանը:
Անդրադառնալով հարցին՝ ինչո՞ւ որևէ բողոքի ակցիա չկազմակերպվեց, Գագիկ Ղահրամանյանը նշեց, որ իրականում մեծամասնության համար անսպասելի էր, շոկ էր։ «Այսօր դրեցին նշանակեցին, հաջորդ օրը բերեցին: Ընդհանրապես, Հայաստանում քաղաքական դաշտի բացակայության արդյունք է, որ իսկապես դժգոհողների թիվն ավելին էր, բայց չկարողացան կազմակերպել: Իմ ունեցած տեղեկություններով՝ որպես ՀԿ-ի նախագահի դիմել են, առնվազն ՀԿ -ների մակարդակով պատրաստվում են եթե ոչ բողոքի ակցիա, ապա թեկուզ գրավոր բողոքի արտահայտելու ինչ-որ մի ձև գտնել: Ինձ, համենայն դեպս, դիմել են, ես իմ համաձայնությունը տվել եմ, այսօր կամ վաղը տեքստը պատրաստ կլինի, տեքստում մենք մեր անհամաձայնությունն ենք հայտնում նախագահի և կառավարության որոշմանը Սյունիքի մարզպետ Սուրեն Խաչատրյանին վերանշանակելու կապակցությամբ»,- հավելեց զրուցակիցս:
Հարցին՝ ուշացած չէ՞ այս քայլը, Գագիկ Ղահրամանյանը պատասխանեց, որ չի կարծում, թե ուշացած է: «Տասն օր հետո եթե գնանք, կազմակերպված Սյունիքի մարզպետարանի դռները փակենք, չթողնենք՝ գա աշխատանքի, չեմ կարծում, թե ուշացած է: Ավելի լավ է, որ տասն օրից լինի, բայց կազմակերպված լինի: Հակառակ դեպքում բամաբասանքի է նման: Մասնավորապես Կապանում մեծամասնության համար անպասելի էր այդ որոշումը, նույնիսկ նրանց համար, ովքեր իբրև աղ ու հացով դիմավորեցին նրան»,- ասաց Գագիկ Ղահրամանյանը:
Անդրադառնալով երեկ հանրահավաքին մի քանի թաղային հեղինակությունների վարքին, մասնավորապես «Լիսկա չի, Սուրեն Խաչատրյան է» արտահատությանը, Գ. Ղահրամանյանը նշեց, որ դրանք «վեցնոցներ» են, մարդիկ են, որ հրահանգում են, նրանք էլ կատարում են. «Իր կաբինետից դուրս են եկել, պետք է արդարացնե՞ն իրենց կերակրատաշտից օգտվելը: Դրանք մի տասը-տասնհինգ հոգի են, մյուսներին կանչում է, վախեցնում, ասում է՝ ցույց տվեք հավատարմությունը, թե չէ սա կանեմ, նա կանեմ, պաշտոնից կզրկեմ, սա է վիճակը»,- ասաց նա:
Գործարար Տիգրան Կարապետյանը, անդրադառնալով հարցին՝ ինչո՞ւ այդպես էլ որևէ բողոքի ակցիա չիրականացվեց, ասաց, որ այդ թեման փակել է իր համար։ «Ես քաղաքական գործիչ չեմ, ես իմ ասելիքը ասել եմ հստակ, ամեն օր նույն բանն ասելու ցանկություն չունեմ։ Լիսկան այլևս ինձ հետաքրքիր չէ, ես այդ թեմային ընդհանրապես չեմ անդրադառնալու: Անիմաստ է արդեն որևէ բան ասելը, ամեն ինչ ասված է, վերջացած»,- հավելեց նա:
Կապանի «Ժառանգության» ներկայացուցիչ Դավիթ Հակոբյանը վստահ է, որ հասարակությունն անտարբեր չի լինի, ավելին՝ կարծում է, ակցիա այնուամենայնիվ կկազմակերպվի: Դավիթ Հակոբյանի նշեց, որ անակնկալ էր տեղի ունեցածը, քանի որ Հայաստանում, մասնավորապես Սյունիքիում որևէ մեկը չէր սպասում, մինչև վերջին րոպեն հավատում էին, որ այդ նշանակումը չի լինի։
«Սյունիքում, մասնավորապես Կապանում, ՀԿ-ները, հասարակական-քաղաքական կազմակերպություններն իրենց խոսքը կասեն: Եթե նայեք ուշադիր, տեսանյութերից երևում են, որ պետական պաշտոնյաներ են աղ ու հացով դիմավորում»,- ասաց նա: Ինչ վերաբերում է «Ժառանգության» քայլերին, ապա, նրա խոսքերով, «Ժառանգությունն» իր դիրքորոշումն արտահայտել է երեկվա հանրահավաքին նույնպես:
