Մյուս եվրոպացիների թվում իտալացիները բոլորից արագ են աշխատում ազատվել Սուրբ ծննդին ստացած անպիտան իրերից՝ դրանք աճուրդի հանելով համացանցի միջոցով: Հունվարի 7-ին՝ տոնական արձակուրդներից հետո, eBay-ում սպասվում է Սուրբծննդյան նվերների զանգվածային վաճառք,- գրում է «Ռոսբալտը»: Դրանց թվում ոչ մեծ տոկոս են կազմում հագուստի աքսեսուարները, համակարգիչները, գրքերը, երաժշտությունը:
Ամեն երրորդ իտալացին արագ աշխատում է իրեն ոչ պիտանի իրը նվիրել ուրիշի, սակայն չի հրաժարվի եղևնու տակ դրված ընկերների կամ հարազատների ավանդական նվերներից: Օրինակ՝ անցած տարի իտալացիները ստացել էին 745 մլն եվրոյի անպիտան իրեր: Ներկայում, տնտեսական ճգնաժամի պատճառով, իրենց նվերները վերավաճառելու ցանկություն հայտնած մարդկանց թիվն ավելացել է ևս 3%-ով: Ընդ որում՝ Ապենինների բնակիչների 51%-ը հայտարարում է, որ երբեք չեն վաճառել կամ վերանվիրել իրենց նվերները ու չեն էլ պատրաստվում դա հետագայում ևս անել:
Ինչ վերաբերում է նվերներին, ապա իտալացիների 53%-ը կցանկանար եղևնու տակ գտնել ինչ-որ կենցաղային իր, 23%-ը երազում են օգտակար նվերի մասին, որը իրենց չեն կարող թույլ տալ գնել, ու միայն 14%-ը կցանկանար ստանալ ինչ-որ անկարևոր զարդարանք, որը դարձյալ իրենք անձամբ չէին գնի, իսկ հարցվածների 11%-ը դժվարացել է նշել, թե ինչ կցանկանար ստանալ: Միջինը սուրբծննդյան նվերների վրա իտալացիները պատրաստ են ծախսել 263 եվրո, ինչը 9%-ով քիչ է՝ համեմատած անցած տարվա հետ:
