Կարեն Դեմիրճյանի անվան մարզահամերգային համալիրում սկսվել է ՀՀԿ 14-րդ արտահերթ համագումարը, որն առաջադրելու է Սերժ Սարգսյանին նախագահի թեկնածու: Հրավիրված են 2000-ից ավել պատվիրակներ և հյուրեր:
ՀՀԿ 14-րդ արտահերթ համագումարի ներկայացուցիչներին ողջունել է ՌԴ նախագահ Վլադիմիր Պուտինի ներկայացուցիչ ԽՍՀՄ և ՌԴ հերոս Արթուր Չիլինգարովը:
Հեռարձակվեց ԵԺԿ նախագահ Վիլֆրիդ Մարտենսի անգլերեն լեզվով տեսաձայնագրությունը: Խոսել է Չինաստանից հրավիրված հյուրը: Համագումարին հրավիրված են Հայաստանում օտարերկրյա դեսպանները, իսկ հայաստանյան կուսակցություններից ՀՅԴ-ից եկել էր Աղվան Վարդանյանը, ԱԺՄ-ից Վազգեն Մանուկյանը, բնականաբար` ՕԵԿ-ը և մի քանի այլ կուսակցություններ: ԲՀԿ-ն ներկա չէր, քանի որ հրավիրված չէր:
Այժմ ելույթ են ունենում օտարերկրյա հյուրերը, նախատեսվում են ՀՀԿ տարածքային կառույցների պատվիրակների ելույթները, որոնք Սերժ Սարգսյանին կառաջարկեն որպես նախագահի թեկնածու: Վերջում նախատեսված է թեկնածու Սերժ Սարգսյանի 50 րոպեանոց ելույթը: Սերժ Սարգսյանի նախընտրական ծրագրի պաշտոնական կարգախոսը լինելու է` «Դեպի ապահով Հայաստան»: Սերժ Սարգսյանի ելույթը բաժանված է մասերի, որոնք վերնագրված են` «Ապահով հայրենիք», «Ապահով ընտանիքներ», «Աշխատանք և արժանապատիվ վաստակ»: Այս պահին ելույթ է ունենում Սերժ Սարգսյանը:
Հովիկ Աբրահամյանը արդեն Սերժ Սարգսյանին հայտարարեց ՀՀ նախագահի թեկնածու:
