«Ռուսաստանը Հայաստանում գործընկեր չունի, նա այստեղ գործիքներ ունի: Եվ այդ իմաստով Հայաստանի համար ստեղծվել է շատ ծանր իրավիճակ: Չի կարելի որևէ գերտերության հետ լինել գործիքի կարգավիճակում: Եթե այստեղ որևէ մեկը ասում է, թե ՌԴ-ի գործընկերն է, մոլորեցնում է հասարակությանը: Եվ սա շատ վտանգավոր իրավիճակ է Հայաստանի համար: Պետք է անպայման փորձել գործընկեր լինել»,- «Առաջին լրատվական»-ի հետ զրույցում ասաց «Ղարաբաղ» կոմիտեի նախկին անդամ Աշոտ Մանուչարյանը՝ անդրադառնալով Գագիկ Ծառուկյանի չառաջադրվելու մասին հայտարարությանը և նրա ռուսամետ լինելու հանգամանքին:
Աշոտ Մանուչարյանի խոսքերով, Հայաստանի քաղաքական դաշտում վերջին տարիներին առկա հիմնական երևույթը պատրանքների ստեղծումը և տապալումն է: «Ցանկացած օլիգարխիկ փիլիսոփայություն կրող համակարգ, իսկ այդպիսին են ՀՀ գրեթե բոլոր քաղաքական ուժերը, պատրանքային է այն իմաստով, որ դրանցից որևէ մեկի հնարավոր հաղթանակը երկրի կյանքում ոչ մի փոփոխության չի բերելու, քանի որ բոլորն ուղղված են հարստության կուտակման փիլիսոփայության հաստատմանն ու պաշտպանմանը: Հիմա կյանքի է կոչվում լրիվ ուրիշ աշխարհ՝ բանական մարդու աշխարհ: Եվ այսօր կյանքի իրավունք են ստանում միայն այն ուժերը և անհատները, ովքեր կլինեն Մարդ մարդու համակարգը առաջարկողները: Որևէ օլիգարխ չի հանդիսանում ուղի, Հայաստանում այսօր գոյություն ունեցող օլիգարխական բոլոր տիպի համակարգերը կործանման ուղի են, և իրենք պետք է հրաժարվեն այդ ուղուց: Հակառակ դեպքում իրենք թիրախ են դառնալու նոր ուղու համար, որը գալիս է հաստատվելու այս աշխարհում»,- ավելացրեց Ա. Մանուչարյանը:
Վերջինս անդրադարձավ նաև նախագահական ընտրություններին «Բարգավաճ Հայաստան» կուսակցության չմասնակցելու դիրքորոշմանը և այդ առումով ՀԱԿ-ի համար ստեղծված իրավիճակին: Չէ՞ որ ՀԱԿ-ը հույս ուներ, որ կամ Գագիկ Ծառուկյանը կառաջադրվեր և իրենք նրա շուրջը կհամախմբվեն, կամ էլ ԲՀԿ-ն կպաշտպաներ ՀԱԿ-ի թեկնածուին: Այս դեպքում ի՞նչ իրավիճակ է ստեղծվել ՀԱԿ-ում, կամ նախագահական ընտրություններում ինչ պետք է անի այդ ուժը: «Երեխան հույս ուներ, որ ծնողները Նոր տարվան մի խաղալիք կնվիրեին, բայց պարզվեց, որ ծնողները զրկվել են աշխատանքից: Մենք այս կարգի խոսակցություն ենք վարում: Ինձ չի հետաքրքրում ՀԱԿ-ի հույսը, Րաֆֆի Հովհաննիսյանի և Սերժ Սարգսյանի հույսը, ինձ հետաքրքիր է մեր հույսը: Ա. Մանուչարյանը դժվարացավ ասել, թե արդյոք կառաջադրվի ՀԱԿ առաջնորդ Լևոն Տեր-Պետրոսյանը:
Նրա կարծիքով` դա առաջ քաշելու համար ֆունդամենտալ հարց չէ: «Բայց կյանքը լի է անակնկալներով: Այսօր շատ ավելի կարևոր է, թե կլինե՞ն մտավոր մարդիկ, որոնք թույլ չեն տա, որ ՀՀ վարչապետն ու պառլամենտը գործեն կողոպուտի համակարգի, հրոսակախմբի օրենքներով: Այդպիսի բան դիտարկվեց 1998-ին, բայց չիրականացավ: Հիմա ժամանակն է վերադառնալ դրան՝ որպես անցումային լավագույն համակարգի: Լավ կլիներ, որ նույն ՀԱԿ-ն ու մյուս ուժերը փնտրեին մի մտավորականի, որի բարոյական նկարագիրը և կամային մտավոր հատկանիշները որևէ կասկած չեն առաջացնում, որոնք հեղինակություն են ժողովրդի աչքում: Եվ նրանք կարող են Հայաստանում ձևավորել այդ կոնսոլիդացիայի մթնոլորտը` անկախ այն հանգամանքից` կկեղծվե՞ն ընտրությունները, թե` ոչ, կհռչակվե՞ն նրանք նախագահ, թե` ոչ: 98-ին քննարկվում էին Ռաֆայել Ղազարյանի ու Պարգև սրբազանի անունները: Համոզված եմ, որ հիմա էլ այդպիսիք կան, նրանց գտնել է պետք: Ժողովրդի կոնսոլիդացիա է պետք առաջացնել: Այդպիսի կոնսոլիդացված ժողովուրդը ի զորու է թելադրել թե՛ ներսում, թե՛ դրսում»,- եզրափակեց Ա. Մանուչարյանը:
