«Երկրորդ նախագահ Ռոբերտ Քոչարյանն իր այդ հարցազրույցում որևէ նոր միտք, նոր գաղափար կամ նոր քննադատություն չի հնչեցրել, որ մեկնաբանելու անհրաժեշտություն առաջանա»,- «Առաջին լրատվական»-ի հետ զրույցում ասաց ԱԺ ՀՀԿ խմբակցության պատգամավոր, պետաիրավական հարցերով մշտական հանձնաժողովի նախագահ Հովհաննես Սահակյանը՝ անդրադառնալով նախկին նախագահի՝ ռուսական լրատվամիջոցներին տված հարցազրույցին:
Հիշեցնենք, որ Ռ. Քոչարյանը օգոստոսի 28-ին ռուսական «Նոև Կովչեգ» թերթին հարցազրույց էր տվել, որտեղ կրկին քննադատել էր ՀՀ իշխանությունների վարած տնտեսական քաղաքականությունը և շեշտել էր, որ իր նախագահության տարիներին Հայաստանի տնտեսությունը մեծ զարգացումներ է ունեցել: Նախկին նախագահն ասել է, թե պետք է առաջնահերթություն դարձնել տնտեսության աճն ու աշխատատեղերի ստեղծումը, այլ ոչ թե ամեն գնով բյուջեն լցնելը: «Ստեղծել արդար մրցակցային միջավայր բիզնեսի, հատկապես մանրի և միջինի համար: Դրան հնարավոր չէ հասնել առանց տնտեսության ապամենաշնորհացման և ազդեցիկ չինովնիկների ու նրանց մտերիմների ախորժակի զսպման»,- հայտարարել է նա:
Այդպիսով նա գործող իշխանություններին անուղղակիորեն մեղադրել էր ամեն գնով և ոչ թե տնտեսության աճի արդյունքում բյուջեն լցնելու, արդար մրցակցային միջավայրի, մանր ու միջին բիզնեսի բացակայության մեջ: Փոխարենը շեշտել էր, որ իր պաշտոնավարման տարիներին Հայաստանում տնտեսական աճի տեմպը 2.5 անգամ ավելի մեծ էր, քան համաշխարհային տնտեսական աճը:
«Եթե ուշադիր կարդաք Ռ. Քոչարյանի նախորդ հարցազրույցները, կտեսնեք, որ որևէ նոր բան չկա, որ մեկնաբանեմ: Եվ ես կարծում եմ, որ երկրորդ նախագահը, ինչպես ինքն է նշել, երբ կգա ակտիվ քաղաքականություն, այն ժամանակ էլ ես մեծ սիրով կհայտնեմ ինչպես իմ անձնական, այնպես էլ մեր թիմի տեսակետը»,- նորից կրկնեց Հ. Սահակյանը:
