Իրաքյան Քրդստանի ինքնավար կառավարությունը «Իսլամական պետություն» ահաբեկչական խմբավորման դեմ պայքարի համար զինամթերք մատակարարելու խնդրանքով դիմել է Ավստրալիային: Ավստրալիայում քրդական կառավարության ներկայացուցիչ Հավալ Սիանն այդ խնդրանքը փոխանցել է երկրի ԱԳՆ ղեկավար Ջուլի Բիշոփին, հայտնում է ավստրալական Financial Review թերթը:
«Քրդական ռազմականացված ստորաբաժանումները (պեշմերգ) միջազգային հանրության անունից պայքարում են «Իսլամական պետության» զինյալների դեմ, և միջազգային հանրությունը պարտավոր է աջակցել մեզ,- այսօր Financial Review-ում հրապարակված հարցազրույցում ասել է Սիանը:- Ահաբեկիչներին պարտության մատնելու համար մեզ անհրաժեշտ է Ավստրալիայի աջակցությունը, մենք զենքի և ռազմական տեխնիկայի կարիք ունենք: Պեշմերգն ու իրաքյան բանակը պետք է միավորեն ջանքերն ու ջարդեն «Իսլամական պետության» զինյալներին, և միջազգային հանրությունը պետք է հնարավոր ամեն բան անի մեզ աջակցելու համար»:
Տեղի ԶԼՄ-ների տեղեկությամբ՝ ներկայումս երկրի կառավարությունը «ուսումնասիրում է Իրաքում Ավստրալիայի դերի ընդլայնման հնարավորությունները և Վաշինգտոնին տեղեկացրել է այդ երկրում և, հնարավոր է, Սիրիայում ռազմական գործողությանը մասնակցելու պատրաստակամության մասին»:
Ավստրալիայի վարչապետ Թոնի էբոթը հայտնել է, որ հիմա այդ թեմայով «ակտիվ խորհրդակցություններ են անցկացվում ԱՄՆ-ի, Կանադայի, Ֆրանսիայի և Մեծ Բրիտանիայի հետ»:
