Սնանկ ճանաչված «Տոնուս» ՍՊԸ-ից խաբված մի քանի տասնյակ բնակիչներ այսօր հերթական անգամ իրենց բողոքը հայտնեցին ՀՀ կառավարության շենքի մոտ՝ խնդրելով օժանդակել իրենց գումարները հետ ստանալու ճանապարհին: Բնակիչներն «Առաջին լրատվական»-ի հետ զրույցում տեղեկացրին, որ 2007թ. ձեռք են բերել բնակարանները, ըստ նախնական պայմանագրի, «Տոնուս» ՍՊԸ-ից, վճարել են ամբողջ գումարը: Շենքը պետք է պատրաստ լիներ 2008թ., սակայն 2014 թվականն է, խաբեությունը շարունակվում է: «Գնում-գալիս ենք նույն ակցիաներով, բողոքներով, խնդրանքներով, սակայն ոչինչ չկա: Ժամանակն անցնում է, և ո՛չ պետությունից, ո՛չ «Արցախբանկից», ոչ էլ առավել ևս սնանկ ճանաչված «Տոնուս» ընկերությունից պատասխան չունենք, թե ինչպես են վերադարձվելու գումարները:
Մեր խնդրանք-պահանջն է, որ այս հարցին լուծում տան: «Արցախբանկը» չգիտի ինչ անել, արդեն հոգնել ենք խաբված լինել, համբերության բաժակը լցվել է»,- ասաց բնակչուհիներից մեկը:
Հիշեցնենք, որ «Տոնուս» ՍՊԸ-ն նորակառույց շենքի բնակարանները վաճառել է քաղաքացիներին, այնուհետև դրանք գրավադրել է «Արցախբանկում»: Շենքի կառուցումից հետո «Արցախբանկը» տիրացել է բնակարաններին, «Տոնուս Քոնսթրաքշնը» սնանկ է ճանաչվել, իսկ քաղաքացիները մնացել են ձեռնունայն: