Իրավիճակը Լեռնային Ղարաբաղի ճակատում խիստ սրվել է. շաբաթվա վերջին մարտերի հետևանքով եղել են տասնյակ զոհեր: Բաքուն և Երևանը միմյանց մեղադրում են տարածաշրջանում ստատուս-քվոն խախտելու մեջ: Այս իրավիճակում նախկին ԽՍՀՄ տարածությունում արյունահեղությունը դադարեցնելու գործում առանցքային դեր կարող է խաղալ Ռուսաստանը, գրում է Կրեմլին մոտ կանգնած «Կոմերսանտ» թերթը: Շաբաթ օրը Երևանը հայտարարեց, որ առաջիկա շաբաթվա ընթացքում Սոչիում կանցկացվի հայ-ադրբեջանական գագաթաժողով: Թերթի աղբյուրը հաստատել է, որ Սերժ Սարգսյանի և Իլհամ Ալիևի միջև հանդիպումը տեղի կունենա օգոստոսի 8-9-ին:
«Դիմադրության նոր ալիքը Լեռնային Ղարաբաղի հակամարտության գոտում վկայում է, որ վերջին տարիներին ինչպես Հայաստանում, այնպես էլ Ադրբեջանում ձևավորվում են նոր քաղաքական էլիտաներ, որոնց ձեռք չի տալիս տարածաշրջանում ձևավորված ստատուս-քվոն»,- «Կոմերսանտին» ասել է Ռուսաստանի Քաղաքական հետազոտությունների կենտրոնի տնօրեն Անդրեյ Ֆյոդորովը: Նրա կարծիքով՝ Լեռնային Ղարաբաղում նոր լարվածությունն անհրաժեշտ է դիտել ավելի մեծ աշխարհաքաղաքական կոնտեքստում: «Հոկտեմբերին Հայաստանը պատրաստվում է անդամակցել Եվրասիական տնտեսական միությանը, ինչն ընդհանրապես չէին ցանկանա Արևմուտքում: Այս իրավիճակում Արևմուտքի համար ձեռնտու կլիներ Հայաստանը ներկայացնել որպես եվրասիական ինտեգրման համար թույլ օղակ»,- կարծում է փորձագետը: Նրա կարծիքով՝ այս տեսանկյունից իրավիճակի սրումը ձեռնտու է Արևմուտքին, որը ցանկանում է խոչընդոտել Ռուսաստանի ինտեգրացիոն նախագծերին:
«Ղարաբաղյան հակամարտությունը հետխորհրդային տարածությունում սառեցված հակամարտության դասական օրինակ է, որն առայժմ թվում է չլուծված: Ժամանակին այն կարգավորելու հնարավորություն կար, սակայն դրան խանգարեցին ամերիկացիները՝ չցանկանալով, որ Ռուսասատանը դիվիդենտներ ստանա Հայաստանի և Ադրբեջանի հաշտությունից»,- ասել է Ռուասատնի ԱԳՆ առաջին տեղակալ Անատոլի Ադամիշինը, որը համակարգում է հակամարտությունների հետ կապված հարցերը ԱՊՀ տարածքում: Նրա կարծիքով՝ այժմ Հայաստանի ու Ադրբեջանի համար իրական է ո՛չ երկարատև քաղաքական կարգավորումը, ինչի համար նախադրյալներ չկան, և ո՛չ էլ զինված դիմակայության շարունակումը, այլ՝ վերադարձը գոյություն ունեցող ստատուս-քվոյին: