Պարզվում է, որ «Բարգավաճ Հայաստան»-ի նվիրած տրակտորները կարող են նաև առգրավվել: Համենայնդեպս, կուսակցական չինովնիկները այդպես են բացատրում տեղեկությունները, որ ԲՀԿ-ի նվիրած տրակտորները հետագայում հետ են վերցվում և կարող են տարվել այլ տեղեր` նվիրելու նպատակով: Այսինքն` «Բարգավաճ Հայաստանն» ունի բազմամյա նվիրաբերման տրակտորներ, որոնք տրվում են, նկարահանվում, տեղեկությունը տարածվում է ամենուր, իսկ հետո արդեն, երբ կրքերը մի քիչ հանդարտվում են, տրակտորները վերցվում են ու «վերանվիրվում» այլ համայնքների:
«Բարգավաճ Հայաստան»-ի այս տեխնոլոգիան կարելի էր նաև կատարելագործել, եթե տրակտորները ունենային, ասենք, աղավնիների կամ շների հատկություն և ինքնուրույն ետ գային: Եղել են այդպիսի «հնարամիտներ», որոնք աղավնի կամ շուն են վաճառել, իսկ հետո վաճառված կենդանիները փախչել են ու վերադարձել իրենց նախկին տերերի մոտ: ԲՀԿ-ի տրակտորներն էլ կարող էին նվիրվել, իսկ հետո ինքնաբերաբար վերադառնալ ԲՀԿ: Այդ կերպ աղմուկը շատ ավելի քիչ կլիներ, ոչ ոք չէր տեսնի, թե ինչպես ԲՀԿ-ն եկավ ու տարավ:
Այս ամենը զավեշտալի է, սակայն իրականում սրանում առկա է հայաստանյան այսօրվա ողբերգությունը, երբ հիշում ենք, որ տրակտորների այս աճպարարությունը կազմակերպող ուժը, այսպես ասած, «միասնական ընդդիմության» հույսն է, և բոլորը սպասում են, թե ինչ որոշում է կայացվելու տրակտորների «մեծ» շարժի արանքում: Երբ քաղաքական աճպարարությունը դառնում է պետականության ապագայի հռչակված հույսը, ընդ որում` գիտական կամ ակադեմիական հիմնավորմամբ մասսաներին մատուցված, դա արդեն ոչ թե ճանապարհ է դեպի ապագա, այլ դեպի անցյալ: Այսինքն` ինչպես որ տրակտորներն են հետ վերցվում, այդպես էլ Հայաստանն է հետ «վերցվում» դեպի անցյալ` ապագա փոխանցվելու փոխարեն:
Այդ տեսանկյունից Հայաստանում ոչ թե «միասնական թեկնածու», այլ «միասնական աճպարար» օպերացիան է իրականացվում, որում ներգրավված ուժերը Հայաստանը տեղափոխում են ժամանակի մեջ՝ ներկայից դեպի անցյալ:
Այսինքն` Հայաստանում փորձ է արվում միասնական ջանքերով ինչ-որ ժամանակի մեքենա ստեղծել, որի միջոցով երկիրը կտարվի հետ՝ ինչքան որ հարկ կլինի: Միայն թե այս դեպքում ժամանակի մեքենայի փոխարեն, ըստ էության, գործ ունենք «ժամանակի տրակտորի» հետ, որը կապահովի բարոյաքաղաքական հետընթացի հռնդյունը:
