Եգիպտոսի ԱԳՆ-ն դատապարտել է Թուրքիայի իշխանությունների կողմից իսրայելա-պաղեստինյան հակամարտության կարգավորման հարցում Կահիրեի միջնորդական դերի սուր քննադատությունը և նախազգուշացրել է երկու երկրների միջև դիվանագիտական հարաբերությունների հնարավոր վատթարացման մասին, հաղորդում է Associated Press-ը:
Ավելի վաղ տեղեկացվում էր, որ Եգիպտոսի ղեկավարությունը հանդես է գալիս խաղաղ առաքելությամբ, որը զինադադար և հակամարտող կողմերի միջև հետագա բանակցություններ է նախատեսում: Իսրայելը ընդունել է զինադադարի առաջարկությունը, սակայն ՀԱՄԱՍ շարժումը երկար բանակցություններից հետո մերժել է այն:
Թուրքիայի վարչապետ Թայիբ Էրդողանը հուլիսի 18-ին կտրուկ քննադատել է Եգիպտոսի ղեկավարությանը՝ երկրի նախագահ Աբդել Ֆաթահ աս-Սիսիին «բռնակալ» անվանելով և հայտարարելով, թե «զինադադարի բանակցություններում չի կարելի հույսը դնել Կահիրեի վրա»:
Շաբաթ օրը հրապարակված Եգիպտոսի ԱԳՆ պաշտոնական հայտարարության մեջ ասվում է, որ Թուրքիայի գործերով հավատարմատարը շաբաթվա մեջ երկու անգամ կանչվել է եգիպտական ԱԳ նախարարություն:
Նրան հայտարարել են այն մասին, որ Էրդողանի «վրդովեցուցիչ» հայտարարությունները թելադրված են «գաղափարական նեղ շահերով», որոնք իբրև թե թուրք վարչապետին կապում են «Մուսուլման եղբայրներ» ասոցիացիայի հետ: Կահիրեն նախազգուշացրել է նաև հնարավոր բացասական հետևանքների մասին, որոնց պատճառը կդառնան նման արտահայտությունները:
Եգիպտա-թուրքական հարաբերությունները վատացել են Եգիպտոսի նախկին նախագահ Մուհամեդ Մուրսիի տապալումից և դրան հաջորդող արյունահեղություններից հետո: Էրդողանը կտրուկ քննադատել է եգիպտացի զինվորականների գործողությունները, որոնք ուղղված էին տապալված նախագահի կողմակիցների դեմ:
Թուրքիան և Եգիպտոսը 2013թ. օգոստոսին խորհրդակցությունների նպատակով հետ են կանչել իրենց դեսպաններին: Նոյեմբեր ամսին Եգիպտոսը թուրք դեսպանին, իսկ Թուրքիան՝ իր եգիպտացի դեսպանին իրենց երկրներում անցանկալի անձ հայտարարեցին:
