Երեկ տեղի է ունեցել Ռուսաստանի Անվտանգության խորհրդի նիստ, որի ընթացքում ՌԴ նախագահ Պուտինն, ըստ էության, սենսացիոն հայտարարություն է արել` ասելով, որ Ռուսաստանի սուվերենության գրավականն այն է, որ նա ոչ մի ալյանսի մեջ չկա: Սա կարելի է որակել որպես Պուտինի վերջնական և անշրջելի անմեղսունակության և ոչ ադեկվատության վկայություն, կամ էլ վերին աստիճանի արհամարhանք և ցինիզմ ՀԱՊԿ-ի գործընկերների հանդեպ` նկատի ունենալով այն, որ ՀԱՊԿ-ն ալյանս է, որի մեջ է Ռուսաստանը:
Պուտինն ասել է, որ ալյանսի մեջ մտնելով` պետությունները հաճախ կորցնում են ինքնիշխանության մի մասը, զիջում են այն, և շատ հաճախ պատահում է, որ զիջում են ոչ պետական շահերին համահունչ:
Գործ ունենք անմեղսունակությա՞ն, թե՞ այնուամենայնիվ անսահման ցինիզմի հետ: Շատ դժվար է ասել: Պուտինին շատ դժվար է հասկանալ, համենայնդեպս` հազարավոր կիլոմետրերի հեռվից:
Սակայն շատ պարզ և հասկանալի է այն, ինչ նա ասում է: Իսկ նա, ըստ էության, ասում է, որ Ռուսաստանի համար ՀԱՊԿ-ը դաշինք, ալյանս չէ: Թե ինչ է, չի ասում: Երևի թողնում է, այսպես ասած, ընթերցողների կամ լսարանի մեկնաբանություններին, կամ հենց ՀԱՊԿ-ի անդամների հայեցողությանը: Կամ չի ասում, որպեսզի այդ անդամների տրամադրությունը չընկնի: Կամ էլ` ասելու բան այլևս չի մնում, քանի որ սրանով ամեն ինչ արդեն ասված է, և ասված է այն, որ Ռուսաստանը ՀԱՊԿ-ն իր համար ալյանս չի համարում:
Սա դառը ճշմարտություն է, որը Պուտինը բարձրաձայնում է` երևի թե վստահ լինելով, որ ՀԱՊԿ-ի անդամներից և ոչ մեկը, այդ թվում` Հայաստանը, չեն համարձակվի բացատրություններ պահանջել նման տարօրինակ հայտարարությունների վերաբերյալ: Մյուս կողմից` անդամներին որևէ բան բացատրելու կարիք էլ, իհարկե, չկա, քանի որ նրանք երևի Ռուսաստանից ավելի լավ գիտեն, որ ՀԱՊԿ-ն, ըստ էության, ալյանս չէ: Եվ առավել քան լավ պետք է իմանան Հայաստանում:
Ինչ ալյանսի մասին է խոսքը, եթե այդ ալյանսի անդամ երկրների առնվազն կեսը հանդիսանում է մյուս անդամի թշնամու ռազմական մատակարար և բիզնես գործընկեր: Պարզապես մինչև այսօր Պուտինը չէր ասել այդ պարզ ճշմարտությունը, և դա ներկայացվում էր որպես հերյուրանքներ և արևմտյան դավադրություն:
Փաստորեն, հիմա Պուտինն էլ ասում է, որ ՀԱՊԿ-ը չկա, և Ռուսաստանը թքած ունի ՀԱՊԿ-ի վրա: Կա՛մ Պուտինն էլ համաշխարհային դավադրության մաս է կազմել, կա՛մ էլ արդեն դավադրություն չկա, կա սրբազան ճշմարտություն` Կրեմլի տիրոջ բերանից ելած:
