1969 թվականի հուլիսի 21-ին մարդն առաջին անգամ հայտնվել է Լուսնի մակերևույթի վրա: Այդ մարդն էր Նիլ Արմսթրոնգը՝ ամերիկյան «Ապոլլոն-11» տիեզերանավի հրամանատարը: Հայտնվելով Լուսնի վրա՝ նրա առաջին հայտնի արտահայտությունը հետևյալն էր. «Դա մեկ փոքրիկ քայլ է մարդու համար, սակայն վիթխարի թռիչք՝ ողջ մարդկության համար»:
Տիեզերանավի անձնակազմը բաղկացած էր 3 տիեզերագնացներից: Արշավախումբը չէր հետապնդում հետազոտական խնդիրներ, այլ նպատակ ուներ վայրէջք կատարել Երկրի արբանյակի վրա և հաջողությամբ վերադառնալ: Առաքելության ընթացքում հրամանատարական տիեզերանավը մնացել էր ուղեծրում, իսկ երկու տիեզերագնացները՝ Նիլ Արմսթրոնգը և Էդվին Օլդրինը, թռչող մոդուլով վայրէջք են կատարել Լուսնի մակերևույթի վրա, հավաքել լուսնային հողի նմուշներ, լուսանկարվել և տեղադրել մի քանի սարքավորումներ:
Մոդուլը վայրէջք է կատարել «Հանգստության ծովի» մոտ հուլիսի 20-ին, ժամը 20:17-ին՝ ըստ Գրինվիչի: 5 ժամ անց Արմսթրոնգը հայտնվել է Լուսնի վրա, իսկ որոշ ժամանակ անց նրան է միացել նաև Օլդրինը:
