«Առաջին լրատվական»-ի «Ցավազրկող» հաղորդաշարը ներկայացնում է ամենատարբեր բարդության վիրահատական միջամտություններ՝ առաջատար բժշկական հաստատությունների վիրահատարաններից: Միայն մեր հաղորդման շրջանակներում բժիշկ մասնագետը վիրաբուժական գործողություն կատարելու հետ միաժամանակ ներկայացնում է միջամտության ընթացքն ու մանրամասները:
Տեսողության հետ կապված խնդիրներ ունեն շատերը: Նման խնդիրների դեպքում մարդն առաջինը դիմում է ակնոցի օգնությանը: Սակայն միշտ չէ, որ ակնոց կրելով հնարավոր է լինում վերականգնել տեսողությունը: Ի՞նչ անել այս դեպքում:
Տեսողության հետ կապված խնդիրներ է առաջացնում նաև կատարակտա կոչվող հիվանդությունը: Հիվանդության զարգացմանը կարող են նպաստել մի շարք հիվանդություններ, այդ թվում՝ էնդոկրին համակարգի խախտումները՝ նյութափոխանակություն, շաքարային դիաբետ:
Հիվանդության առկայությունը կարող է պայմանավորված լինել ժառանգական գործոնով, ինչպես նաև օրգանիզմի բնականոն ծերացման գործընթացով: Կատարակտայի ժամանակ աչքի բյուրեղիկը մասամբ կամ ամբողջությամբ կորցնում է թափանցիկությունը: Մինչ այժմ բուժման լավագույն տարբերակը վիրահատական միջամտությունն է:
Վիրահատական մեթոդներից ամենահաճախ կիրառվում են կատարակտայի էքսրակապսուլյար էքստրակցիայի և ֆակոէմուլսիֆիկացիայի եղանակները:
Կատարվում է կատարակտայի էքստրակապսուլյար էքստրակցիա՝ հետին խցիկային ոսպնյակի իմպլանտացիայով: Վիրահատությունը կատարում է «Մեդ Լայն» բժշկական կենտրոնի ակնաբուժական բաժանմունքի վարիչ, ակնավիրաբույժ Վահե Նանյանը:
Ֆակոէմուլսիֆիկացիայի մեթոդով կատարված վիրահատությունը դիտեք «Առաջին լրատվական»-ի «Ցավազրկող» հաղորդաշարի հաջորդ թողարկմանը: