«Ամերիաբանկը» հերթական անգամ վաճառքի է հանել գործարար, սնանկացման եզրին հայտնված Փայլակ Հայրապետյանի՝ բանկում գրավադրված անշարժ գույքի հերթական մասը: Այս անգամ վաճառքի է հանվել Հայրապետյանին պատկանող «Ծովազարդ» հյուրանոցային համալիրը: Հայրապետյանի բոլոր ջանքերը՝ կանգնեցնել միջդատական փուլում իր գրավադրված ունեցվածքի վաճառքը, ապարդյուն են անցնում:
«Եթե այդ գործընթացներում ներգրավված է նախկին վարչապետը, ապա ամեն ինչ էլ հնարավոր է: Հենց նա ժամանակին իրավունք տվեց այս երկիրը քանդել, քանդեցին ու հիմա էլ շարունակում են քանդել: Էս երկրի տուն քանդողը հենց մեր բանկերն են: Ամեն ինչ անում են, որ վարկ վերցնողը տանուլ տա, որ նրա ունեցվածքը, տունը, հողը, մեքենան մնա իրենց: Իսկ այդ ամենաթողության, հանցագործների հովանավորը արդեն երկար տարիներ Տիգրան Սարգսյանն էր»,- ասաց Հայրապետյանը:
Հիշեցնենք, որ Հայրապետյանն «Ամերիաբանկում» գրավադրել էր 33 միլիոն դոլար արժողությամբ անշարժ գույք, որպեսզի գործարար Աշոտ Սուքիասյանի հետ համատեղ ադամանդի արդյունահանման գործ սկսեր: Սուքիասյանն Աֆրիկայի Սիեռա Լեոնե պետությունից պետք է ադամանդի հումքը բերեր Հայաստան, որտեղ էլ պետք է մշակվեր այն: Բանկը գումարը տրամադրել էր Սուքիասյանին, բայց բիզնես-ծրագիրը, ինչպես հայտնի է, կյանքի չկոչվեց, ինչի պատճառով էլ բանկը սկսեց վերցնել և վաճառել Հայրապետյանի գրավադրած գույքը: Նախ՝ նրանից խլեցին «Հայաստան» հանրախանութի շենքը: Որոշ ժամանակ առաջ ՀՀԿ-ական պատգամավոր Մհեր Սեդրակյանը` Թոխմախի Մհերը, գնեց Հայրապետյանին պատկանող Գաջեգործների 1/1 հասցեում գտնվող նախկին «Էրեբունի» միավորման տարածքը, դրանից հետո վաճառվեցին գործարարին պատկանող մանկապարտեզի շենքը և մի շարք այլ հաստատություններ:
«Ինձ արդեն տեղյակ չեն էլ պահում, իրենք իրենց վաճառում են: Ասում եմ՝ գոնե սպասեք, թող նախաքննություն լինի, դատ-դատաստան լինի, հետո ինչ ուզում եք՝ արեք: Նախագահին եմ գրում, դատախազին եմ գրում, բայց բոլոր այդ գրությունները գնում են քննիչի մոտ, ու ոչ մի արդյունք»,- հավելեց Հայրապետյանը:
Անդրադառնալով Աշոտ Սուքիասյանի պաշտպանի այն հայտարարությանը, թե Սուքիասյանի դեմ հարուցված քրեական գործը պետք է կարճվի և Փայլակ Հայրապետյանի դեմ քրեական գործ հարուցվի, Հայրապետյանը դա որակեց «անգրագետ էշություն»:
Հավելենք նաև, որ Աշոտ Սուքիասյանի արտահանձնումից հետո դեռևս որևէ առերեսում տեղի չի ունեցել օֆշորային սկանդալի հերոսների միջև, ոչ էլ Հայրապետյանն է հրավիրվել լրացուցիչ հարցաքննության:
