Ուրբաթ երեկոյան Ճապոնիայի ոստիկանությունը ձերբակալել է ԱՄՆ-ի ռազմածովային ուժերի ներկայացուցչին, որը ուժեղ հարբածության վիճակում մտել է ինտերնետ սրճարան և այնտեղ ամբողջությամբ մերկացել: Ինչպես հաղորդում է «Կիոդո» գործակալությունը՝ միջադեպը տեղի է ունեցել այն բանից հետո, երբ Ճապոնիայում ԱՄՆ-ի ռազմածովային ուժերի քննդատված հրամանատարությունը խոստացել էր խստացնել զինվորականների պահվածքի նկատմամբ վերահսկողությունը և պաշտոնապես ներողություն էր խնդրել նախկինում տեղի ունեցած միջադեպերի համար:
Ոստիկանության ներկայացուցիչների խոսքերով՝ համացանցային սրճարանում ձերբակալվել է ամերիկյան Ջորջ Վաշինգթոնի անվան ավիակրի անձնակազմի անդամ, 23-ամյա Օսկար Հեյս Վիգայլը:
Ինչպես հաղորդում է ոստիկանությունը, Վիգայլը, գտնվելով ալկոհոլի ազդեցության տակ, երեկոյան իր երկու ընկերների հետ մտել է սրճարան՝ թեթևանալու նպատակով: Իրավապահները չեն մանրամասնում՝ զինվորականը հասե՞լ է արդյոք զուգարան, թե՞ ոչ: Հաղորդվում է, որ նա ամբողջությամբ մերկացել և սկսել է շրջել սրճարանում այդ տեսքով, ինչը լուրջ խախտում է համարվում Ճապոնիայում:
Ինքը՝ իրավախախտը, ընդունել է, որ կարիքները հոգացել է սրճարանում, սակայն հերքում է, որ ամբողջությամբ մերկացել է:
Նշենք, որ ամերիկացի զինվորականների համար Ճապոնիայում պարեկային ժամ է սահմանվել այն բանից հետո, երբ ԱՄՆ-ի ռազմական ուժերի երկու զինվորական Օկինավայում ճապոնացի մի աղջիկ էին բռնաբարել:
Ընդհանուր առմամբ, Ճապոնիայում գտնվում է, տարբեր հաշվարկներով, 47-52 հազ. ամերիկացի զինվորական: Նրանց գրեթե կեսը տեղակայված է Օկինավայում:
