Սևանին հարող հատվածում՝ Դրախտիկ, Շորժա, Արևիկ գյուղերի երկայնքով փռված թանկարժեք տների տարածքները պատկանում են «Սևան ազգային պարկ» ՊՈԱԿ-ին, դրանք աճուրդի ենթակա չեն, տրվում են բացառապես վարձակալության հիմունքներով:
Դրախտիկցիները ցույց են տալիս գեղեցիկ շինությունները՝ հերթով տալով տերերի անունները:
Պաշտպանության նախարար Սեյրան Օհանյանի հսկայական ամառանոցը գտնվում է Դրախտիկի հատվածում՝ Սևանի ափին: Այն աչքի է ընկնում իր տարածքի մեծությամբ, պարիսպներով և գեղեցիկ շինություններով: Դրախտիկի գյուղապետարանից տեղեկացրին, որ ափամերձ հատվածները պատկանում են «Սևան ազգային պարկ» ՊՈԱԿ-ին:
ՊՈԱԿ-ի տնօրենի տեղակալ Սարգիս Մուրադյանն «Առաջին լրատվական»-ի հետ զրույցում նշեց, որ ափամերձ տարածքները պատկանում են «Սևան ազգային պարկին», և բոլոր հողերը տրվում են վարձակալության հիմունքով:
««Սևան ազգային պարկի» տարածքում սեփական հողեր գոյություն չունեն, հողերը տրվում են վարձակալության հիմունքով»,- ասաց նա՝ հավելելով, որ եթե նախկինում օրենքը թույլ էր տալիս մինչև 99 տարի վարձակալությամբ հողեր տրամադրել, հիմա ցուցանիշը որոշակիորեն իջել է՝ վարձակալության պայմանագրերը կարելի է երկարացնել մինչև 60 տարի:
Վարձակալության համար քառակուսի մետրը սկսվում է 35 դրամից և հասնում մինչև 50-70 դրամի:
Ի դեպ, Սարգիս Մուրադյանը նշեց, որ վարձակալությամբ տրվող հողատերերի մեջ չկան նախարարներ:
