Թուրքական Zaman թերթի փոխանցմամբ, կասկածներ կան, որ Դիաբեքիրում հարկադիր վայրէջք կատարած, Իրանից Սիրիա ռազմական տեխնիկա փոխադրող իրանական օդանավում կարող է հայտնաբերվել միջուկային զենք:
Նշվում է, որ երբ իրանական Il-76TD ինքնաթիռը հատել է Թուրքիայի օդային սահմանը, Դիաբեքիրում գտնվող Թուրքիայի ռազմաօդային ուժերի 2-րդ հրամանատարության հրահանգով անմիջապես նրան ընդառաջ են սլացել թուրքական F-16 տիպի երկու կործանիչներ, որոնք իրանական օդանավին հարկադրել են վայրէջք կատարել Դիարբեքիրի օդանավակայանում: Դա տեղի է ունեցել երեկ ուշ երեկոյան` ժամը 23.00-ին (այլ տվյալներով` 01.00-ին):
Թուրքական կողմը կասկածել է, որ իրանական օդանավում կարող է գտնվել միջուկային զենք, ինչի համար էլ Անկարայից համապատասխան մասնագետների խումբ է կանչվել Դիարբեքիր: Ներկա դրությամբ շարունակվում են միջուկային զենքի որոնողական աշխատանքները:
Հիշեցնենք, որ սա առաջին դեպքը չէ, երբ իրանական ռազմական օդանավերը հարկադիր վայրէջք են կատարում Դիարբեքիրում: Մասնավորապես, նմանատիպ դեպքեր գրանցվել են 2006 թվականին, երբ Լիբանանը պատերազմում էր Իսրայելի դեմ, և Իրանն օդանավերով զենք էր մատակարարում այնտեղ իշխող «Հիզբոլլահ» կազմակերպությանը:
2006 թվականի հուլիսի 27-ից օգոստոսի 17-ն ընկած ժամանակահատվածում Դիարբեքիրի օդանավակայանում իջեցվել են իրանական 5 բեռնատար և 1 քաղաքացիական օդանավեր:
