Անդրադառնալով կենսաթոշակային համակարգի բարեփոխումներին` ՀՀ նախկին վարչապետ Հրանտ Բագրատյանը նշեց, որ այն, ինչ կառավարությունը արել է, բացարձակ հիմարություն է: Նա հիշեցրեց, որ այս ամենն սկսվել է դեռեւս 8-9 տարի առաջ. ապահովագրության, կենսաթոշակառուների բոլոր գործերը, չգիտես ինչու, տեղափոխվեցին Կենտրոնական բանկ: «Այն ժամանակ Կենտրոնական բանկի նախագահը Տիգրան Սարգսյանն էր, նրա թափը, խոսքը Ռոբերտ Քոչարյանի մոտ ավելի մեծ էր, քան Անդրանիկ Մարգարյանի: Բայց ԿԲ-ն ինչ կապ ունի ապահովագրության գործի հետ` ոչ ոք չգիտի: Դա նույն բանն է, երբ եկեղեցին սկսում է զբաղվել կրթությամբ, առողջապահությամբ, արտաքին քաղաքականությամբ, իսկ արդյունքում` պետությունը վերանում է»,- ահազանգեց Հրանտ Բագրատյանը եւ առաջարկեց մի պահ պատկերացնել, որ նրանց առաջարկած սխեման աշխատի: «Մեկ տարվա մեջ 300 միլիոն դրամ քաղաքացիներն են դնում, 300 միլիոնն էլ պետությունն է դնում: Հլա Տիգրան Սարգսյանի խելքին նայեք, այդ 600 միլիոնով դրսում արժեթուղթ պետք է գնեն: Պարզվում է` մեկն ուզում է այս 600 միլիոնանոց հիմնարկի պետ դառնալ», -նշեց Հրանտ Բագրատյանը եւ ավելացրեց, որ սրանք մի 9 տարի հետաձգել են այդ ծրագիրը, իսկ հիմա էլ ասում են, թե մի երեք տարի էլ կհետաձգվի, ինչը նշանակում է, որ ոչ թե հետաձգում են, այլ հրաժարվել են այդ ծրագրից, քանի որ մինչ այդ իշխանությունը կփոխվի: Բացի այդ` համարձակություն չունեն ասելու, որ սխալ ծրագիր են մշակել: