Հանրային խորհուրդը օրերս հեռուստաեթերի բարելավման առաջարկություններ ներկայացրեց ՀՀ նախագահին: Հանրային խորհրդի անդամ Հովիկ Մուսայելյանը «Հ2» հեռուստաընկերության «Խոսքի իրավունք» հաղորդման եթերում ասել է, որ իրենք փորձել են եթերից անճաշակությունը հեռացնել. «Մաթեմատիկական ճշգրտությամբ հնարավոր է որոշել, թե որն է անճաշակ, որն է ճաշակով, բայց որոշ սահմանափակումներ կարելի է անել` ինչը կարելի է ցույց տալ, ինչը` ոչ»: Հանրային խորհրդի անդամը նշել է, որ իրենք դեմ են եղել քաղաքական լրատվական հաղորդումերին խառնվելուն` բազմակարծությանը չխոչընդոտելու համար:
Խոսքը սերիալների, ժամանցային հաղորդումների մասին է: Հանրային խորհրդին կից գործելիք մարմինը մշակումներ է անելու և ներկայացնելու է ԱԺ-ին: Իհարկե, թեև այժմ ևս դեռահասների առողջությանը, մտավոր-ֆիզիկական դաստիարակությանը վնասող հաղորդումների սահմանափակում կա, սակայն չափորոշիչները չեն գործում: Օրինակ, ըստ Մուսայելյանի, մեր առօրյայում շատ են սթրեսները, և առավոտյան, երբ միացնելով հեռուստացույցը՝ սպանություններ ու պայթյուններ են տեսնում, դա ազդում է մարդկանց վրա: «Այստեղ պետք է նաև հեռուստաընկերություններն ինքնակարգավորման քայլեր իրականացնեն»,- ասել է բանախոսը:
Հանրային խորհրդի անդամներն առաջարկել են բարելավել ՀԱՌԱՀ-ի կողմից հեռուստաընկերություններին լիցենզիաներ տրամադրելու կարգը, պահանջներում հաշվի առնել հասարակության տարբեր խավերի նախասիրությունները: Մենք բոլորս հասկանում ենք, որ այստեղ արագ ոչինչ չի ստացվելու, եթե հեռուստատեսությունները պատրաստ չլինեն Հանրային խորհրդի և հանրության հետ կոնսենսուսի գալու: Մենք աշխատում ենք, որ այդ կարգը հասարակական պահանջին համապատասխան լինի: Նաև առաջարկում ենք, որ ՀՌԱՀ-ը հետևողական լինի իրեն վերապահված գործառույթներում»,- ասել է ՀԽ–ի անդամը` հավելելով, որ եթե որևէ հեռուստաընկերություն իրեն տրված որևէ դրույթ խախտում է, չկա հստակեցում, թե ինչ անել:
Հովիկ Մուսայելյանն անդրադարձել է նաև «Հ1»-ին առաջիկայում առևտրային գովազդից զրկելու հարցին. «Հաղորդումները, բացի լրատվական-քարոզչականից, նաև բիզնես են ներառում, և որքան շատ մարդ է նայում, այնքան գովազդատուները շատ են, և հեռուստաընկերությունները լսարան ապահովելով են տարված: Անկախ նրանից, թե ինչ արտադրանք ես մատուցում, կարող է հաղորդման ռեյտինգը բարձր լինի: «Հ1»-ը մեր կողմից հարգված է, բայց կարծում ենք, որ այն պետք է տարբերվի մյուսներից, պետք է նշաձողը բարձր լինի, և քանի որ պետբյուջեից է սնվում, ուրեմն պետք է չընկնեն ավելորդ մրցակցության հետևից, և հաղորդումներն ունենան դաստիարակիչ դեր: Քննարկումների արդյունքում որոշվեց, որ ընդհանրապես արգելվեն «Հ1»-ով առևտրական գովազդները»,– ասել է Մուսայելյանը:
