Ադրբեջանական Turan լրատվական գործակալության փոխանցմամբ՝ այսօր Բաքվում տեղի է ունեցել «Մարդու իրավունքներն ու ինտերնետի ղեկավարումն անքակտելիորեն կապված են միմյանց հետ» խորագրով միջազգային ֆորում, որին մասնակցել է նաև Ադրբեջան ժամանած ԵԱՀԿ-ի՝ ԶԼՄ-ների ազատության հարցերով հատուկ ներկայացուցիչ Դունյա Միյատովիչը:
Վերջինս համաժողովի ժամանակ հայտարարել է. «Ինտերնետն ու մարդու իրավունքները փոխադարձաբար լրացնում են միմյանց, դժվար է դրանք պատկերացնել միմյանցից տարանջատված: Մի շարք երկրներ կիրառում են ինտերնետի ֆիլտրում՝ հասարակական շահերի, ազգային անվտանգության պաշտպանության և ահաբեկչության, ծայրահեղականության, ատելության բորբոքման դեմ պայքարի պատրվակով արգելափակում են կայքեր:
Սակայն շատ հաճախ այդ միջոցները կիրառվում են քննադատող ձայները լռեցնելու համար: Ինտերնետը վիրտուալ տիրույթ չէ, այն արդեն մեր կյանքի կարևոր մասն է: Դրա համար էլ ճիշտ չի լինի մարդու իրավունքներն ու ազատությունները բաժանել off-line-ի և on-line-ի: ՄԱԿ-ի բանաձևն ուղղված է ինչպես off-line ազատության, այնպես էլ on-line ազատության պաշտպանությանը: Ազատ արտահայտվելը չունի սահմաններ:
Պետության կողմից կայքերն արգելափակելու, ֆիլտրում կիրառելու և նմանատիպ այլ փորձերը դատապարտված են ձախողման: Փորձը ցույց է տալիս, որ որևէ սահմանափակում չի կարող կանգնեցնել ազատության հանդեպ մարդկանց ձգտումը: Ինչ վերաբերում է Ադրբեջանում ազատ արտահայտվելու խնդրին, ապա դրական է, որ բանտերից ազատ են արձակվել այն մարդիկ, որոնց ձերբակալումը մտահոգության տեղիք էր տվել: Սակայն բանտերում դեռ գտնվում են այլ լրագրողներ ու բլոգերներ: Անթույլատրելի է լրագրողներին հետապնդելը, նրանց ձերբակալելը, ծեծելը և ճնշման այլ մեթոդներ կիրառելը»:
