ԵՀՄՖ նախագահ Աշոտ Գրիգորյանը նախկինում «Առաջին լրատվական»-ի հետ զրույցում ասել էր, որ սպասում են որոշ նախարարների նշանակմանը, որպեսզի տեսնեն կհամագործակցե՞ն նոր կառավարության հետ, թե՝ ոչ:
Իմանալով արդեն բոլոր նախարարների անունները՝ Ա․ Գրիգորյանից հետաքրքրվեցինք, թե ի՞նչ տեսակետ ունի: Ի պատասխան մեր հարցադրմանը՝ Գրիգորյանն ասաց, որ իրենք սպասելիքներ ունեին, որոնք չարդարացան. «Մեր ամբողջ ներդրումային ծրագրերը՝ կապված Հայաստանի հետ, մենք ուղղակիորեն ածանցում էինք նոր նախարարների կաբինետ ստեղծելու հետ: Իհարկե, առանձնապես մեծ հույսեր չունեինք, որ կարող է փայլուն կաբինետ լինել, բայց որ այսպիսի ողբերգություն կգար մեր ազգի գլխին՝ ևս չէինք սպասում: Մենք անընդհատ պահանջում էինք Տիգրան Սարգսյանի հրաժարականը, և եթե մեզ հարցնեին, թե ով է երկրորդ հանցագործը մեր տնտեսությունը կոռումպացված դարձնելու և կործանելու համար, մենք կասեինք ՊԵԿ նախագահ Գագիկ Խաչատրյանը: Հանկարծ Գագիկ Խաչատրյանը ավելի բարձր պաշտոնի է արժանանում, սա ոչ մի այլ անունով չենք կարող կոչել, քան ցինիզմ ամբողջ տաս միլիոն հայության նկատմամբ»,- ասաց նա:
Մեր զրուցակիցը հավելեց, որ իրենք խիստ վդովմունք են հայտնում այսպիսի խեղկատակությունների համար, և ընդգծեց, որ այս կաբինետն ավելի վատն է, քան նախորդը, որ կարողացավ տնտեսությունը հիմնովին կործանել. «Եթե նախկինում մեկ-երկու նախարարներ կային, որ որոշ չափով նորմալ էին աշխատում, նրանց ազատեցին և փոխարինեցին այնպիսի մարդկանցով, որոնք ապահովելու են Սերժ Սարգսյանի մինչև 2018 թվականի նախագահումը՝ մեկ հատկանիշ ունենալով՝ նվիրվել նրան ու աչքերը ամեն ինչի վրա փակել»:
Աշոտ Գրիգորյանն ասաց, որ նոր կառավարությունում չկա մի անուն, որի մասին կարելի է լավ խոսել. «Գագիկ Խաչատրյանը մեջների տիտանն է, որևէ նոր անուն, որի հետ կարող ենք համագործակցել՝ չգիտեմ: Որոշ քայլեր կանենք իհարկե, կհամագործակցենք, բայց միայն նրա համար, որ հանկարծ նախագահը չասի, որ առանց սպասելու՝ կարծիք ենք հայտնում, չասի՝ եթե այդքան հայրենասեր եք, ինչո՞ւ չեք փորձում: Կփորձենք, պարոն նախագահ, բայց սկզբից էլ հայտարարում ենք, որ ավելի ծանր արդյունքներ ենք ունենալու, կփորձենք, որ հանկարծ «սխալված» դուրս չգանք»,- եզրափակեց նա:
