Թուրքական Cihan լրատվական գործակալության փոխանցմամբ՝ Թուրքիայի արտգործնախարար Ահմեդ Դավութօղլուն մեկնել է Կոստա Ռիկա, ուր օրեր առաջ այցելել էր նաև Հայաստանի արտգործնախարար Էդվարդ Նալբանդյանը:
Այստեղ Դավութօղլուն հանդիպել է Կոստա Ռիկայի արտգործնախարար Էնկե Կաստիլյոյի հետ: Հանդիպումից հետո կազմակերպված համատեղ մամուլի ասուլիսի ժամանակ Դավութօղլուն հայտարարել է, որ երկու երկրները միջազգային արենայում օժտված են կարևոր պոտենցիալով, և չնայած Թուրքիան ու Կոստա Ռիկան աշխարհագրական առումով բավական հեռու են գտնվում միմյանցից, նրանք շատ հարցերում նման հեռանկար ունեն:
Դավութօղլուն հավելել է, որ հանդիպման ժամանակ իրենք բանակցել են Կոստա Ռիկայում դեսպանատուն բացելու շուրջ՝ ընդգծելով, որ Կոստան Ռիկան կարևոր տեղ է զբաղեցնում Լատինական Ամերիկայում:
Հիշեցնելով, որ նախորդ երկու տարիների ընթացքում Թուրքիան 3 դեսպանատուն է բացել Հարավային Ամերիկայում՝ Դավութօղլուն հայտարարել է, որ այս տարի էլ Թուրքիան 2 դեսպանատուն է բացելու Հարավային Ամերիկայում:
Դավութօղլուի խոսքերով՝ ներկայումս Թուրքիայի և Կոստա Ռիկայի միջև ապրանքաշրջանառության ծավալը կազմում է 90 միլիոն դոլար, ինչը, սակայն, կարող է հասցվել մինչև 500 միլիոն դոլարի: Կաստիլիոն իր հերթին ընդգծել է, որ իրենք մեծ կարևորություն են տալիս Թուրքիայի հետ համագործակցությանը:
Հիշեցնենք, որ երեկ թուրքական մամուլը, վկայակոչելով Ազգային հետախուզական կազմակերպությանը (MIT), հայտնել էր, որ Հայաստանը տվել է ԼՂՀ-ի միջազգային ճանաչման մեկնարկը՝ այդ պլանում ընդգծելով նաև օրեր առաջ Հայաստանի արտգործնախարար Էդվարդ Նալբանդյանի լատինաամերիկյան շրջագայությունը, որի շրջանակներում նա այցելել էր Վենեսուելա, Էկվադոր, Մեքսիկա, Գվատեմալա և Կոստա Ռիկա:
