ԱՄՆ պետքարտուղար Ջոն Քերին «չի համարում և ոչ հրապարակավ, ոչ գաղտնի չի ասել, թե Իսրայելն ապարտեիդի պետություն է»: Երկուշաբթի օրն ԱՄՆ պետդեպարտամենտում հերթական ճեպազրույցի ժամանակ ասել է նրա պաշտոնական ներկայացուցիչ Ջեն Պսակին՝ ամերիկյան մամուլում սկանդալային հրապարակման վերաբերյալ: Այս մասին տեղեկացնում է ITAR-TASS-ը:
Կիրակի օրը Daily Beast-ը հայտնել էր, որ իր տրամադրության տակ կա Ջոն Քերիի՝ անցած ուրբաթ օրն ԱՄՆ-ից, Արևմտյան Եվրոպայից, Ռուսաստանից և Ճապոնիայից բարձրաստիճան պաշտոնատար անձանց և փորձագետների խմբի հետ փակ հանդիպման ժամանակ ասած արտահայտության ձայնագրությունը:
Գնահատելով Մերձավոր Արևելքում խաղաղ կարգավորման հեռանկարները՝ Քերին, մասնավորապես, հայտարարել է. «Երկու պետությունների գոյակցության վրա հիմնված որոշումը հստակորեն կնշվի որպես միակ իրական այլընտրանք: Քանի որ ունիտար պետությունն ի վերջո դառնում է ապարտեիդի պետություն, որտեղ երկրորդ սորտի քաղաքացիներ են, կամ այնպիսի տեղ, որտեղ քանդվում է հրեական պետություն լինելու Իսրայելի ունակությունը»:
Պսակին սկզբում զգուշացրել է, որ չի հաստատի նույնիսկ փակ հանդիպման ժամանակ պետքարտուղարի որևէ խոսք ասելու փաստը: Բայց երբ նրան քիչ ավելի ուշ հարցրել են՝ արդյոք այդ բառերը վկայո՞ւմ են Ջոն Քերիի հիասթափության և այն մասին, որ նա կորցնում է մերձավորարևելյան կարգավորման ուղղությամբ պայմանավորվածություն ձեռք բերելու հույսը, Պսակին պատասխանել է. «Բոլորովին: Դուք լսել եք, թե նա ինչպես ընդամենը անցյալ շաբաթ ասաց, որ պահպանում է երկու կողմերի (պաղեստինյան և իսրայելական) ճիշտ որոշումներ ընդունելու հույսը»:
Ըստ Daily Beast-ի հրապարակման՝ ուրբաթ օրը Քերին ասել է, որ մի պահ կարող է առաջադրել խաղաղ համաձայնության իր պայմանները և երկու կողմերին առաջարկել դրանց պատասխանաել՝ «այո կամ ոչ»:
