«Առաջին լրատվական»-ի զրուցակիցն է ՀԱԿ անդամ Լյուդմիլա Սարգսյանը:
– Տիկին Սարգսյան, Կոնգրեսը ե՞րբ է հայտարարելու, թե նախագահական ընտրություններին ում թեկնածությունն է առաջադրելու: Տպավորություն կա, թե սպասում եք, մինչև ԲՀԿ-ն կհստակեցնի իր դիրքորոշումը:
– Դա կարվի, երբ քաղաքական դաշտը կհստականա: Մենք ոչ մեկին էլ չենք սպասում, բայց ես չեմ կարող Լևոն Տեր-Պետրոսյանի փոխարեն այդ հարցին պատասխանել: Նա ունի իր հաշվարկները, իր մոտեցումները, իր վերլուծությունները: Երբ այդ ամենը կավարտվի, նա կկայացնի իր որոշումը: Եվ ես հույս ունեմ, որ կհայտարարի, թե նախագահական ընտրություններին ՀԱԿ-ի թեկնածուն ինքն է լինելու:
– Կարծիք կա, որ եթե Լ. Տեր-Պետրոսյանը չառաջադրվի, դա կբերի ՀԱԿ-ի պառակտմանը, քանի որ այդ կառույցում թեկնածու լինելու հավակնորդները մի քանիսն են: Եվ նրանց մեջ գոյություն ունեցող հակասության արդյունքում ՀԱԿ-ը կքանդվի:
– Ես այդպես չէի ասի: Կոնգրեսը կշարունակի որպես կառույց գոյություն ունենալ, կփորձի ավելի ուժեղանալ, ամրանալ, որովհետև դա նախ պետք է Հայաստանին և ոչ թե այն քաղաքական ուժերին, որոնք գտնվում են ՀԱԿ-ում: Իսկ եթե Լ.Տեր-Պետրոսյանը չառաջադրվի, կարծում եմ, որ այդ դեպքում կկորցնի հայ ժողովուրդը: Նախագահական ընտրություններին առողջ մրցակցություն չի լինի, և Ս. Սարգսյանը հնարավորություն կունենա կրկին վերարտադրվել:
– ՀԱԿ-ին մաս կազմող գրեթե բոլոր գործիչները Ձեզ նման հայտարարում են, որ նախագահական ընտրություններին Կոնգրեսի թեկնածուն պետք է լինի Տեր-Պետրոսյանը: Այդպիսով դուք կարծես անուղղակի «ճնշում» եք գործադրում նրա վրա և նրան չառաջադրվելու այլընտրանք չեք տալիս:
– Դա մեր ցանկությունն է: Մենք որպես նախագահի արժանի թեկնածու նրան ենք տեսնում: Դա մեր մեղքը չէ, որ նա ամենաարժանին է: Նրա նկատմամբ որևէ ճնշում նույնիսկ չակերտներով չի կարող լինել, որովհետև նա հաշվարկով մարդ է մեծ փորձառություն ունեցող պետական գործիչ է:
– ՀԱԿ-ը նախօրեին կողմ քվեարկեց ԲՀԿ-ի մի քանի նախագծերին, որ ընդգրկվեն օրակարգ: Եվ ընդհանրապես ՀԱԿ-ը գրեթե միշտ պաշտպանում է ԲՀԿ ծրագրերը: Սակայն այդ կուսակցությունից ՀԱԿ-ի ծրագրերին ու նախագծերին փոխադարձ աջակցություն չեն ցուցաբերում:
– Ոչինչ չունեմ ասելու, մենք գտանք, որ ճիշտ է աջակցելը և գտանք, որ այդ օրինագծերը պետք է մտնեն օրակարգ: Եվ մենք ոչ թե ԲՀԿ-ին էինք աջակցում, այլ գտնում էինք, որ դրանք պետք է մտնեն օրակարգ ու քննարկվեն: Իսկ ինչ վերաբերում է մեզ աջակցելուն, ապա ԲՀԿ-ն ինքն է որոշում, թե մեր որ նախագծին պետք է միանա: ԲՀԿ-ն պետք է հասկանա, և բոլորս ենք հասկանում, որ քաղաքական մեծամասնության բոլոր կարգի մղումները զսպելու համար պիտի կարողանանք համախմբվել և որոշ հարցերի շուրջ միասնական քվեարկություններ ապահովել:
– ՀԱԿ համակարգող Լևոն Զուրաբյանը հայտարարեց, որ ՀԱԿ-ը և ԲՀԿ-ն միասին պետք է հասնեն Սերժ Սարգսյանի հրաժարականին: ՀԱԿ-ում դեռ հույս ունե՞ն, որ այսքան քննարկումներից, իրադարձություններից ու սպասումներից հետո ԲՀԿ-ն ոչ թե ՀՀԿ-ի և Ս. Սարգսյանի, այլև ձեր հետ է միանալու:
– Դա ցանկությունների ոլորտից է: Համենայնդեպս ԲՀԿ-ն պետք է հասկանա, և հուսով եմ` իրենք գիտակցում են, որ Ս. Սարգսյանին և իշխանությանը միայնակ դիմակայել չեն կարողանա:
– Բայց նրանք ուզո՞ւմ են դիմակայել:
– Եթե ուզում են որպես քաղաքական միավոր պահպանվել, պետք է ցանկանան ու կարողանան դիմակայել: Եթե չեն ուզում դիմակայել, ուրեմն որպես քաղաքական միավոր կդառնան ընդամենը իշխանության մեկ այլ արբանյակ: Եթե ԲՀԿ-ն նորից միացավ իշխանությանը, որպես քաղաքական ուժ վերանալու է: Այն ընտրազանգվածը, որն այսօր ունի ԲՀԿ-ն, միանշանակ կկորցնի:
– Կարծիք կա, որ ԲՀԿ-ի ընտրազանգվածի ավելացումը ՀԱԿ-ի շնորհիվ և ՀԱԿ-ի հաշվին եղավ:
– Ես այդպես չեմ համարում, որովհետև ԲՀԿ-ն շատ ակտիվ քարոզարշավ ծավալեց, այդտեղ նաև տարբեր գործոններ աշխատեցին: Կարծում եմ, որ ուներ որոշ կայուն ընտրազանգված: Իհարկե, չեմ բացառում, որ նաև մեր ընտրազանգվածի մի հատված այդ պահին քվեարկել է ԲՀԿ օգտին:
– Քաղաքագետների միության նախագահ Հմայակ Հովհաննիսյանը հայտարարեց, որ միասնական շտաբը փող է ստացել ԲՀԿ ղեկավար Գագիկ Ծառուկյանից: ՀԱԿ-ը այդ շտաբի անդամ էր: Ին՞չ գումարների մասին է խոսքը:
– Եթե հիշեք, թե ընտրություններից ի վեր Հ. Հովհաննիսյանը ինչքան աբսուրդային հայտարարություններով է հանդես եկել, կհասկանաք, որ սա ևս սրանց շարքում է: Նա ընդամենը լուծում է մի խնդիր՝ գոյատևել, հիշեցնել իր մասին, որպեսզի քաղաքական դաշտում կարողանա պահպանվել: Բայց կարծում եմ, որ դրա համար սխալ գործելաոճ է ընտրել:
– «Ժառանգություն» և «Ազատ դեմոկրատներ» դաշինքը պառակտվեց: Այդ երկու կուսակցությունների անդամները տարիներ առաջ ՀԱԿ-ում կամ ՀԱԿ-ի հետ էին աշխատում: Ձեր կարծիքով նրանց համագործակցությունը, հետո բաժանումն ի՞նչ պատճառներ ուներ:
– Այդ պառակտումը կանխատեսելի էր, որովհետև դա արհեստածին միավորում էր: Այդ կառույցը երկար չէր կարող գոյատևել: Ես կարծում եմ, որ երկու քաղաքական ուժերը երբ առանց դաշինքի մի ցուցակում են հայտնվում, նրանց այնքան էլ լավ հեռանկար չի սպասվում: Տարբեր հարցերում նրանցից ամեն մեկն ունի իր մոտեցումները: Իսկ համագործակցության մասին լուրերն ու կարծիքներն այն ժամանակ շատ ակտիվ շրջանառվում էին, տպավորություն կար, որ տեղի է ունենում արևմտամետ ուժերի համախմբում: Բայց ինչպես տեսանք այդ համախմբումը տեղի չունեցավ, քանի որ դա արհեստածին միավորում էր:
– Կոնգրեսի մասին էլ կարծիք կա, որ ռուսամետ ուժ է:
– Կոնգրեսը ոչ ռուսամետ է, ոչ էլ արևմտամետ է: Կոնգրեսը հայաստանակենտրոն ուժ է, և մենք չպիտի բացառենք ո՛չ Արևմուտքին, ո՛չ էլ Ռուսաստանին: Արևմուտքի և Ռուսաստանի միջև հավասարակշռությունը պիտի կարողանանք պահպանել, որպեսզի Հայաստանը` որպես ինքնիշխան պետություն, կարողանա ուժեղանալ:
– ՍԴՀԿ-ն կուսակցության 125-ամյակին նվիրված համագումար է անելու: Դուք այդ համագումարին չե՞ք մասնակցելու, կամ Ձեր ղեկավարած կառույցն առանձին համագումար չի՞ անելու:
– Նրանք չեն կարող համագումար անել, քանի որ պետռեգիստրում նրանց գրանցումը դատարանում վիճարկվում է: Ավելի քան վստահ եմ, որ մենք հաղթելու ենք, և նախկին՝ ատենապետ Լյուդմիլա Սարգսյան գրանցումը վերականգնվելու է: Եվ իսկական և ընդհանրապես ՍԴՀԿ-ն հայաստանյան այն կառույցն է, որը ՀԱԿ-ի կազմում է գործում: Եվ կարծում եմ, որ և՛ քաղաքական դաշտը, և՛ լրագրողական աշխարհը, նույնիսկ իշխանությունները որպես ՍԴՀԿ հայաստանյան կառույցի ատենապետ ճանաչում են Լյուդմիլա Սարգսյանին: Գրանցման վիճարկումը դատական գործընթացում է, հետևաբար` չի կարող որևէ համագումար լինել, քանի դեռ դատական վճիռ չկա: Ինչպես մենք չենք կարող անել, այդպես էլ իրենք չեն կարող անել: Իսկ համագումար անելու տեղեկատվությունն էլ սխալ է: Որքան գիտեմ, ՍԴՀԿ Կենտրոնական վարչության ատենապետ Սեդրակ Աճեմյանի կողմից հայտարարություն էր եղել, որ կուսակցության 125-ամյակը նշվում է հոկտեմբերի 20-ին՝ իրական ծննդյան օրը, բայց հետաձգվել է նոյեմբերի 3-ին: Դա համագումար չէ, այլ հանդիսավոր նիստ է նվիրված կուսակցության այդ ամյակին:
– Ս. Աճեմյանը ձեր կուսակցական ղեկավա՞րն է:
– Մենք անկախ կառույց ենք՝ գրանցված ՀՀ օրենքի համապատասխան: Իհարկե, մենք համագործակցություն ունեցել ենք, բայց այսօր անկախ կառույց ենք: Մենք նրա հետ կապ ունեինք որպես քույր կառույց: Եվ փորձում էինք ամեն կերպ մեր անկախությունը պահպանել և համապատասխանեցնել Հայաստանում գործող օրենքներին: Դա խնդիր դարձավ, քանի որ Ս. Աճեմյանը փորձում էր ամեն կերպ ազդել մեր ներքին որոշումների վրա: Մեր օրենքով անթույլատրելի է, որ կուսակցությունները դրսից ղեկավարվեն:
– Ս. Աճեմյանն այժմ Գևորգ Պերկուպերկյանակա՞ն թևի հետ է:
– Այո՛, բայց այնտեղ թև չկա: Կարծում եմ, որ նա վատագույն տարբերակն է ընտրել, և շատ ցավալի է, որ կուսակցության 125-ամյակի առիթով կազմակերպում է տոնակատարություն, որին իրականում հայաստանյան կառույցը չի մասնակցում: Իսկ հայաստանյան կառույցը մենք ենք:
– Դուք կապեր ունե՞ք այլ երկրների հնչակյան կառույցների հետ:
– Կապեր կան, բայց ես չեմ փորձում այդ կապերն օգտագործել: Համահնչակյան կենտրոնական վարչությունն այսօր Ս. Աճեմյանի հետ է, որովհետև միշտ այդպես է եղել դրվածքը: Եվ քանի որ նա ազդեցություն ունի բոլոր կառույցների վրա, ես չեմ փորձում իմ շփումներով պարզապես վտանգել այդ կառույցների ղեկավարների գործը:
– Հայաստանում մեկ այլ հնչակյան կառույց կար, որի ատենապետն էր Էռնեստ Սողոմոնյանը:
– Այդ կառույցն արդեն իր լիազորությունները կարող է ավարտված համարել: Այն իրականում չկայացավ և չէր էլ կարող կայանալ: Նորաստեղծ բոլոր կարգի կառույցները դատապարտված են ոչնչանալուն: Այդ թվում և՝ 2 տարի առաջ Ս. Աճեմյանի կողմից ստեղծված կառույցը:
Լուսանկարը՝ PanARMENIAN Photo-ի
